Langalakhe Mabena
ABACULI, abalingisi labanye abalamathalenta kwezobuciko koBulawayo bakhuthazwa ukuthi bayezama inhlanhla ekukhethweni kwabazadlala emdlalweni othi: King Mzilikazi: The Musical, ohlose ukugubha impilo lelifa lesizwe samaNdebele.
Abaqondisa umdlalo lo, sebeqalile ukuhlola labo abalesifiso sokuba yingxenye yawo. Abafunakalayo ngabalingisi, abahlabeleli, abagidayo kanye labanye abathanda ukuba yingxenye yomdlalo lo omayelana lembali.
Umdlalo lo ukhangelelwe ukwethulwa okokuqala koBulawayo ngoMpandula ngomnyaka ka-2027, ngesikhathi kukhunjulwa iNkosi uMzilikazi.
Ukuhlolwa kokuqala kwalabo abafisa ukuba yingxenye yomdlalo lo kwenziwa mhlaka 20 lo 21 Mfumfu eKhaya Arts Village eTshabalala. Ihlandla lesibili lokuhlolwa kuhlelwe ukuba lenziwe mhlaka 31 Mfumfu endaweni efanayo.
Kusitatimende, abalungiselela umdlalo lo bathe bafuna amadoda labesifazane abaleminyaka ephakathi kwengu-18 le 35. Baveze njalo ukuthi ukuhlolwa kuzaqhubeka kuze kuyephela uMpalakazi.
“Ekuhloleni kwethu sifuna amadoda labesifazane abaleminyaka ephakathi kwengu-18 kusiya ku-35. Lokhu yikuqala nje. Ukuhlolwa kuzaqhubeka kuze kuyephela uMpalakazi, ngakho-ke lingaphuthelwa lithuba lokuba yingxenye yento ezabhalwa embalini,” kutsho isitatimende.
Umdlalo lo ukhangelelwe ukuhlanganisa ukulingisa, umculo, ukugida kanye lokulandiswa kwembali ukuze kuvezwe imbali kunye lamasiko esizwe samaNdebele.
Imbongi njalo engumculi uAlbert Nyathi nguye okhokhela umsebenzi lo njengomqondisi omkhulu, kuthi umbhali wemidlalo uThabani Hillary Moyo abe nguye obhala umdlalo. UMatesu Dube yena ungumsizi womqondisi wezobuciko.
Ithuba leli livulela abakundima yezokuzithokozisa ithuba lokutshengisa amathalenta abo ngesikhathi besenza umsebenzi omkhulu wezokulingisa ogxile komunye wabantu abaqakatheke kakhulu embalini yeZimbabwe.
Imigido yesintu efana lendlamu, isitshikitsha lamabhiza ikhangelelwe ukuba yingxenye yomdlalo lo. Kuzaphinda kube lezigaba zokulingisa eziveza amasiko ezempi ayesetshenziswa embusweni wamaNdebele.
Ngaphandle kokujabulisa abantu, umdlalo lo uhlose ukulondoloza imbali yethu, imigido kanye lamasiko ngesikhathi kusethulwa imbali yeNkosi uMzilikazi.
Ukwethulwa komdlalo lo okukhangelelwe ukuba khona ngoMpandula ngomnyaka ka-2027 kuyingxenye yemizamo yokugubha ilifa leNkosi uMzilikazi kanye lembali yesizwe samaNdebele.
Abafisa ukuba yingxenye yomdlalo lo bakhuthazwa ukuthi baye hlolwa ngensuku ezibekiweyo.
