Iqoqo: Umdumo wezinkondlo
Owalotshwa ngu N.S Sigogo labanye
Inkondlo: Asifanani eyalotshwa ngu A.J.N Ndlovu
Ophezulu Stinta
Injongo
IMBONGI ngokuloba inkondlo le ibihlose ukufundisa izinto ezithile abantu abahlangana lazo empilweni.
Abantu bayafundiswa ukuthi kuqakathekile ukwamukela indlela ababunjwe ngayo emzimbeni inengi lilakho ukuthi lizisole ngendlela umuntu ayabe ebunjwe ngayo ufice olomzimba esekhalela ukuthi acake locakileyo ekhalela ukuthi azimuke.
Sikunanzelela lapho imbongi isithi “Abanye kwabo balutshwane, Ungamangali, vele kasifani”.
Kuyisikhuthazo esikhulu esivelela kumbongi ukuthi abantu bamukele basuthiseke ngendlela ababunjwe ngayo ngoba bonke abantu badalwe ngokutshiyeneyo.
Injongo yesibili njalo ehloswe yimbongi yikuthi abantu bafunde ukwamukela umbala wabo njengoba bedalwe nguMlimu. Abanye badalwe bababomvu, abanye badalwe babamnyama.
Kulezinsuku abantu sebegcoba amafutha ukuze bazitshintshe umbala babemhlophe labo.
Imvelo ngeqiniso abantu bavele badalwe ngemibala engafananiyo abantu kabangazikhathazi ngokufuna ukuzitshintsha imibala kabamukele indalo yemvelo akulalutho olubi ngombala umuntu adalwe eyiwo wona. Lokhu sikunanzelela lapho imbongi isithi “Yebo kambe kasifanani, Khangela nanku umdaka omnyama, khange-la nank’ omunye omhlophe”.
Empilweni iminwe kayilingani. Siyathola abantu sebezihlupha ngemibuzo eminengi nengi ukuthi yindaba bona beswela empilweni kukanti abanye bethola okudlula bona, besebezibona sengathi mhlawumbe ngabakhethi-weyo bekhethelwa ukuhlupheka.
Imbongi ke iyakuchasisa ukuthi vele ngendalo kaSomandla bakhona abaswelayo, bakhona njalo abatholayo abanothileyo abalala ngezisu ezibomvu. Konke akwenzi abantu behlukane kumbe abanye bazeyise bonke baphefumula umoya ofanayo kudingeka kuphela umuntu akwamukele kunjalo okuqakathekileyo kuyikuphila. Imbongi iyagcizelela ukuthi konke lokhu kuyiziphiwo ezitshiyeneyo abantu kabavume kuphela kuqhutshekwe ngempilo.
Imbongi iyagcizelela njalo ukuthi impilo le iqukethe izinto ezinengi eziveza umehluko wempilo, umehluko lo kawupheleli ebantwini kodwa ke lakumvelo ngokwayo. Ithi kulendawo ezilugwadule, kulendawo ezilubhuqu kuthi ke ezinye zibe lemifula kwezinye indawo kulemithombo, kutshiyene konke akufanani, imvelo le iyaphila iqhubeke kungela hlupho, ngoba vele kayifanani layo umehluko yiwo oletha impilo kwezinye izidalwa kanye labanye abantu.
