admin
Cornelius Lupahla loMsilisi Dube
SEZIPHELELWE ngamasu izakhamizi zelokitshini leNkulumane nanko phela imizamo yonke yokukhipha ondofa isehlule nanko phela kubikwa ukuthi sebehlasela abantu ngokuphindiweyo.
Kuzwakale ukuthi ngeSonto ntambama kwabizwa otsikamutanda ababuthanisa izakhamizi ukuthi zizobona kukhitshwa ondofa laba.
Kubikwa otsikamutanda laba baqonda ezindlini lapho ondofa abahlupha khona bethi bayabakhipha.
UMthunywa uxhumane loMnumzana Gideon Mangena ukhansila wakule indawo wabika ukuthi laye wayekhona mhla otsikamutanda laba bethi bakhipha ondofa.
“Lami ngangikhona mhla otsikamutanda laba bethi bakhipha ondofa. Ngalesosikhathi ngangikholwa ukuthi babakhiphile kodwa khathesi sengibonile ukuthi babelamanga ngoba khathesi ondofa laba sebetshaya ukwedlula ekuqaleni,” kulandisa uMnu Mangena.
UNkosazana Princess Moyo ohlala kulelilokitshi ubikele iphephandaba ukuthi otsikamutanda laba babuya bezithwalele uphonjwana lwabo bathi uphondo lolu lubaleke endlini elekheli ethi 1262 balubamba ku-1261.
Ngemva kwalokho bathi bafuna imbuzi emhlophe yokulungisa ezindlini lezi ukuze baxotshe umoya wabondofa laba.
“Otsikamutanda laba balamanga abakhiphanga ndofa kodwa babuya bezithwalele uphonjwana lwabo bafika baluthukuza emqamelweni bathi ngundofa asebemkhiphile.
“Sathi sibabuza ukuthi ondofa laba ngabakabani bathi ngeke baqambe umnikazi ngoba abafuni ukuxabanisa abantu. Ngemva kwalokho bathi bafuna imbuzi emhlophe ukuze baxotshe umoya wabondofa laba kulezizindlu.
“Ngokubona kwami otsikamutanda laba bafuna ukuzitholela inyama njengoba bengahlawulwanga lutho ngemva kokuqamba amanga bethi bakhipha undofa,” kulandisa uNkszn Moyo.
Kubikwa ngemva kokuqamba amanga kwabotsikamutanda laba bathi sebebakhiphile kanti yayisiwuchithile umuthi inkonyane. Bavuka ondofa batshaya amafasitela ngamatshe ubusuku bonke ku-1263. Ugogo ohlala kule indlu kuzwakale ukuthi lithe lingakaphumi ilanga wabe esetshaye utshani ebalekela ondofa laba. Noma kunjalo kabazange bame ukutshaya ondofa laba, kuze kube namuhla lokhe betshaya.
Ukhansila Mangena uphethe ngokuthi abasafuni bantu besintwini ukuthi bazekhipha umoya lo sebedinga abafundisi kumbe abaphurofethi abaqinileyo.
Online Reporter