Ubulala asebenza laye, alale lesidumbu amalanga amabili

The driver was escorted to ZRP Mutare Traffic where a passive test for alcohol was conducted and it tested positive

Unfortunately, the lesson came too late for 27-year-old Collen Ishmael, who will now spend 20 years in the slammer for a dispute over a US$5 transportation fee that went horribly wrong.

Danisa Masuku

KUSEHLAKALO esitshwaqisa umzimba, kulendoda yeHope Fountain bucwadlana lakoBulawayo okubikwa yahlahlela enye esebenza layo yafa qede yalala insuku ezimbili lesidumbu.

UButholezwe Ndlovu (31), owayesebenza emgodini eHope Fountain, waxabana loKhumbulani Sibanda (20) ngaphambi kokuba ingxabano yabo iphele ngokuchitheka kwegazi.

UNdlovu umiswe emthethwandaba omkhulu kuviki ephelileyo watholakala elecala lokubulala engahlosanga wagwetshwa ukuyapika ejele iminyanga eyisificaminwe mibili.
Kuvele ukuthi uNdlovu ekuxabaneni kwakhe loSibanda wamhlahlela ngehloka kabili ekhanda, wawela phansi wopha kakhulu waze wafa.

Kulokuthi abikele amapholisa ngokubulala kwakhe, uNdlovu kuthiwa wahudulela isidumbu sikaSibanda endlini yakhe, walala laso okwamalanga amabili.

Kubikwa abanye ababesebenza bonke sebenanzelele ukuthi uSibanda kabonakali, baqala ukumdinga bayathola isidumbu sakhe endlini kaNdlovu sesikusimo esibi basebebikela lamapholisa.

Ngesikhathi ebuzwa ngesidumbu sikaSibanda esatholakala endlini yakhe, uNdlovu wavuma ukuthi nguye owambulalayo, wabuye wathi wayegcine isidumbu ngoba esesaba ukubotshwa.

UNdlovu uvele phambi kukamehluli womthethwandaba omkhulu uNaison Chivhayo, ngoLwesihlanu olwedlule esetheswa icala lokubulala, kodwa wagwetshwa icala lokubulala engahlosanga.

Ugwetshelwe ukuhlala ejele okweminyaka eyisificaminwe mibili.
Ekhuluma ngesikhathi ekhipha isigwebo, uMehluli uChivhayo usole ukwanda kodlakela ezindaweni ezilemigodi yokwemba.

“Abantu sebeguqula izindawo zekwemba zaba yizinkundla zokulwa, kanti kumele kube zindawo zomnotho ezithuthukisa ilizwe.”

Uqhubekele phambili esithi: “Abanye abatsha abangaziphathanga kabasaqakathekisi impilo yomuntu, sebebulala mahlayana nje. Impilo yomuntu ilahlekile, kodwa owenza ububi lobu ulokhu ephila.”