Online Reporter
YiNtatheli kaMthunywa
SEKUTHUNYELWE iqembu lengcitshi lapho okwenzakale khona ingozi yendizamtshina eMarondera, eMashonaland East, ukuze kuchwayisiswe ngokufa kukasomabhizimusi uWicknell Chivayo, umkakhe uLucy Muteke labanye abantu abane.
Abantu abayisithupha laba bafe ngoLwesithathu kusihlwa ngesikhathi indizamtshina abakade behamba ngayo isiwa duzane leWaddilove Mission epulazini eliseMarondera Rural.
Iziphathamandla zikaHulumende ezigoqela uMphathintambo wogatsha lweTransport and Infrastructure Development uFelix Mhona, kanye lamalunga ebutho esizwe, ababona ngezokuphepha kukazulu bafike endaweni yesehlakalo ngoLwesine.
UMqondisi weCivil Aviation Authority of Zimbabwe (CAAZ), uMnumzana George Mashababe, ukhulume leziphathamandla endaweni yesehlakalo.
“Indizamtshina le, elamaphiko kukhanya angathi ngesikhathi isiwa ifike yatshayeka ngamandla phansi okungabe kubangele ukuchitheka kwamafutha. Lokhu kungabe kubangele umlilo obusulandela lapho obekuchitheke khona amafutha,” kutsho uMashababe.
Uthe ukuhlolisisa lokhu kusaqhubeka.
Indizamtshina le, iwe ngezikhathi zabo-5 ntambama.
Ekhuluma endaweni yesehlakalo, isikhulumi semuli uMnumzana Herbert Chivayo uthe umdeni uqinisa imbiko yokufa kukaWicknell Chivayo lomkakhe uLucy Muteke.
“Ngitshelwe ukuthi indizamtshina le ibilabantu abayisithupha. Abanye abathathu ngabatshayeli ababili lomsizi kaChivayo,” kutsho uMnu Chivayo.
Isikhulumi samapholisa elizweni uCommissioner Paul Nyathi ukuqinisekisile ukuwa kwendizamtshina eMarondera Rural ngezikhathi zabo-5 ntambama.
