Online Reporter
Nkosilathi Sibanda
INENGI labazali abalabantwana abafunda ezikolo zekhansili yakoBulawayo kababhadali i-school fees.
Ikhansili ithe ikhathazekile ngokwanda kwenani labazali abangenelisi ukubhadala i-school fees njalo lokhu sekuphazamisa inhlelo zokwabela imfundo edolobheni.
Lokhu kuqinisekiswe ngumbiko okhitshwe luhlangothi lweHousing and Community Services, lapho ikhansili eveze ukuthi idinga amaqhinga okuthi ithole izikwelede esezedlula iZWG163 miliyoni.
Kubikwa njalo ukuba kulezi izikwelede, kugoqela lemali evela kuhlelo lweBasic Education Assistance Module (Beam).
Iphephandaba leMasiyephambili Weeekly libika ukuba emhlanganweni wekhansili ngoNhlangula, umqondisi weHousing and Community Services uMnumzana Dictor Khumalo, uveze ukuthi izikolo ezingu-31 ezingaphansi kwekhansili zathola imali edlula i-ZWG21 miliyoni kuphela kunyanga ezintathu zokuqala komnyaka.
UMnu Khumalo uthe okukhathazayo yikuthi ikhansili ayikatholi imali yeBeam kuHulumende kusukela ngomnyaka ka-2022.
“Abafundi bonke abasezikolweni ezingu-31 zekhansili bangu-39 492. Phakathi kwenyanga zakuqala kulumnyaka, kwabhadalwa iZWG21 619 234, kodwa iZWG163 496 144 yasala ingakabhadalwa,” kutsho uMnu Khumalo.
Uthe isikwelede seBeam sifika kuZWG38 491 016.
UMnu Khumalo uthe ikhansili labaphathi bezikolo baqhubeka bekhuthaza abazali ukuthi bagcwalise izithembiso zabo.
Ngakolunye uhlangothi, uMnu Khumalo uveze ukuthi ugatsha lwabo lusebenza labanye emphakathini ukuletha i-inthanethi ezikolo ukuze abafundi lababalisi bathole ulwazi olungeziweyo ngokusebenzisa imitshina yakulezi insuku.
Uthe amalunga ePhalamende amanengi, amakhansila lamaSchool Development Committees asephathise izikolo ngama-kit eStarlink ngenhloso yokuthuthukisa ukusetshenziswa kwe-intanethi.
