UMLINGISI wodumo uFortune Ruzungunde, owathandwa ngabanengi kuleli ngokulingisa kwakhe enguFolomani kumdlalo kamabonakude owawudumile othi Sinjalo, owethulwa liqembu le-Amakhosi, kasekho.
Udadewabo kamufi, uMemory Ruzungunde, uqinisekise ukuthi umfowabo utshone izolo emini esibhedlela seParirenyatwa.
UMemory uthe uRuzungunde ubesesukile koBulawayo waya emzini wakhe oseNharira, eduzane leChivhu, ngenxa yokuthi ubesephathekile emzimbeni kunyanga ezedluleyo.
Kukhangelwe ukuthi angcwatshwe eNharira ngoLwesine.
Kusenjalo, umlobi wemidlalo lomqondisi wayo uRaisedon Baya usethule amazwi enduduzo ngokudlula emhlabeni kukaRuzungunde, amchaze njengomunye wabovulindlela kwezokulingisa eZimbabwe.
“Izolo ngamukele umbiko obuhlungu wokwedlula kwenye ingcitshi kwezokulingisa,” kubhala uBaya enkundleni zokuxhumana.
“Khumbulani uFolomani kumdlalo wamahlaya owawudumile othi Sinjalo, owethulwa yi-Amakhosi Theatre. UFortune Ruzungunde wayengomunye wabovulindlela, engomunye wabalingisi bokuqala ukusebenza le-Amakhosi Theatre.
“Walingisa njalo ku-Stitsha, Jazzman – The Story of Life laku-Dabulap. Ungomunye walabo abavula indlela kwabanye, ikakhulu emidlalweni. Ngizwa kuthiwa udlulele eHarare. Ngithemba ukuthi imbali yakhe izasala ibonakala lakuzizukulwane ezizayo.”
