IBHAYIBHILI elingcwele lithi; yenza kwabanye lokho lawe ofuna kwenziwe kuwe. Babengaphosisi abatsho njalo ngoba kubuhlungu nxa sezibuya ngakuwe hatshi okokudlala uyathi kuyakuhlolela.
Yikho ke lani bobaba elilemali lakho konke okucwebezelayo okuhuga abantwana abangamantombazana okumele likucabange lingakakhombisi abantwana abalingana labantwabenu.
Cabanga kunguwe umntanakho sedlaliswe ngenye indoda eyintanga yakho yatshiya indodakazi yakho oyithandayo sime kubi, mhlawumbe senindwe legcikwane lengculazi. Okubuhlungu inengi lamantombazana lawa ngelisesikolo, ikusasa labo lihle libhidlike nje konakale yonke into.
Likhumbule phela ukuthi intsha le yiyo ikusasa yelizwe, yekelani abantwana bafunde.
Kuyadanisa ukuthi abantwana abangamantombazana bangabona umuntu olemali bayathatheka ngento ezingancediyo eziphambanisa ikusasa labo, asephelile yini amajaha seligijimela oyihlomkhulu?
Yebo kunzima ikakhulu lina elisema Nyuvesithi nxa libona abanye ontanga benu behamba ngezimota bengadli ezibabayo ngaphandle kwebilebile abazifakela lona. Usuka uzibone sulahlekile susalele emuva abanye behamba lesikhathi lawe uthatheke weqele ikanti sungena engozini ezaphazamisa impilo yakho yonke.
Lingavumeli inhliziyo mankazana, uyaphila ngalokho olakho, yeneliseka ngalokho olakho ngeke ufe. Ngoba lawo ma-Blesser eliwagijimelayo ayingozi, azakudlalisa, akuthengele noma yini oyifunayo uzibone susemazulwini kodwa isiphetho yikuzisola usugula kumbe usulomthwalo ongawufuniyo, kambe uyabe ezagcinwa ngubani umntwana wakhona njengoba lawe nje usagcinwe ngabazali?
Ngoba ixhegu lelo uzathi ulitshela ukuthi sumi kubi lihle lidliwe ngumswenya nje lenombolo zikamakhalekhukhwhini zihle zingasangeni ubone angathi ulomnyama kanti uzenzile. Yikho phela labadala bethi umzenzi kakhalelwa kukhalelwa umenziwa pho uzakhalelwa ngubani ngoba ubukhuzwa ufaka izigodo endlebeni.
Kungakho kuqakathekile ukuthi ungavumi ukuthatheka loba suhlangane lobunzima obunjani. Qinisela kuyadlula lokho, umuntu kafunde aqeqetshe ezifundweni zakhe asebenze yikho ezathola lokho okufunwa yinhliziyo yakhe engasadingi imali zamadoda abanikazi.
Yazi ukuthi ngemva kwawo wonke lawo maxhegu owabonayo agijimisa amantombazana amancane kulenina labantwana balo abakhalayo abadinga uyise osekhohlwe ngabo walandela okomhlaba.
