Online Reporter
ASAZI ukuthi umuntu uyabe sedubeke okungakanani nxa seyatshontshela omunye umuntu lokho akusebenzele iminyaka eminengi yena avele atshontshe nje kungabi ndaba zalutho. Kumbe
yikufuna ukudla izithukuthuku zabanye? Liyatsho leBhayibhili elingcwele ukuthi ukutshontsha yisono esikhulu umuntu okungamelanga asenze, kodwa abanye bayatshontsha bezwisa abanye ubuhlungu.
Phela ukutshontsha kuqala ngento encane nje yikho ke lapho okumele uzame ukukulwisa utshaye ngedolo phansi ucele kuMdali akuncedise ekulwiseni isilingo lesi ngoba ungaqhubeka utshontsha kuzaphambanisa impilo yakho kwenzeke amashwa uthi mhlawumbe kuyakuhlolela.
Kambe nxa umuntu ezaphuma endlini yakhe ekuseni avalelise imuli yakhe sibili athi uya emsebenzini esitsho ukuyatshayela abanye abantu izikhwama uyabe esitshoni? Kwehlulani ukuthi uthengise lokhu lalokhuyana njengabanye, loba kungeneli lokho okufunayo kuzalunga ngelinye ilanga wonke umuntu uqala phansi. Kambe uyabe ungumuntu onjani ofuna ukuvuka ulele uyetshontsha imisebenzi yabanye abantu beginqa beginqela wena ukuthi uzotshontsha.
Nansi ke indaba nxa lawe ungomunye walaba abalezandla, abaledimoni lokutshontsha. Lizafika elingaliyo, lapho ke ozabona ukuthi loba sekutheni ngeke lizikhothe emhlane iqili. Uzatshontshela abangatshontshelwayo, abangeke bakumele ukuthi bona bayasebenza ngamandla abo onke besebenzela imuli zabo wena ubuye ngokuhluthuna kuphela.
Kuyadanisa ukuthi kuyonale iviki kulosomabhizimusi wakoBulawayo enzikini yedolobho odutshulwe wafa yizigebengu zamthathela i-US$10 000 ephuma esitolo sakhe.
Kambe yimpilo bani eyokufuna ukuphila ngodli sonke isikhathi ungafuni ukusebenzisa ezakho izandla.
Banengi esihlangana labo sebeyizilima abanye sebehlanya sizwe ngabantu sebesithi wayelisela elidumileyo bamlungisa abaziyo. Uthole umuntu sehawulisa umzwele ukuthi shuwa umuntu wahawula kangaka ingaphi iNkosi, kukanti hatshi wayekhuzwa engalaleli waze wafika komlindi uyacina. Abanye umuntu uyafa ngoba seswele lapho angathola khona usizo ngoba engamazi lalowo muntu amtshontshelayo.
Omunye isikhwama satshona sinamathele esandleni ngendaba zokutshontsha lezi, sesingabasola abantu kodwa akusicala phela ukuvikela impahla zakho ngoba zinengi izigangi la phandle. Umuntu sengacabanga ukuthi into ayitshontshayo incane ngeke umuntu ayidinge, akulanto okuthiwa ayilancedo emuntwini, okwenza abe layo yikuthi uyayidinga.
Ngakho ke ozazi ukuthi ulesandla ulisela kazibambe, azithibe, khuza inhliziyo yakho ungenzi izinto ezilihlazo ezizwisa abanye ubuhlungu.
