Online Reporter
YiNtatheli kaMthunywa
UMONGAMELI welizwe uEmmerson Mnangagwa usephinde wagcizelela ukuzimisela kukahulumende ukwakha iZimbabwe eqinileyo futhi ethuthukileyo, lapho okungelamuntu ozasala ngaphandle.
Ekhuluma lezinkulungwane zabantu akade bebuthene eMvurwi, esabelweni seMashonaland Central, izolo ntambama emkhosini weMunhumutapa Day, owenziwa okwesithathu, uMongameli uthe umkhosi lo uqakathekile ngoba uhlonipha imbali yelizwe ngaphambi kokubusa kwamazwe aphetshaya njalo uthatha izifundo ezingasetshenziswa ekuthuthukiseni ilizwe.
“Umbuso weMunhumutapa ulokhu uluphawu olukhulu lwalokho okwakungenziwa ngumphakathi owawuthuthukile kungakafiki abelungu njalo ulendlela ezithuthukileyo zokuzihlela. Wakhelwa phezu kokusebenza nzima kwezomnotho, amasiko aqinileyo, isibindi, ukusungula izinto ezintsha, ukusebenza gadalala lokuzimela,”
UMongameli Mnangagwa uthe umbuso lo wawulawula inhlangothi ezinkulu zomkhonomi njalo wawusebenzisa inotho yemvelo yeZimbabwe, okugoqela igolide lekhopha, kweminye imkambo kanye lezokuthengiselana lamazwe omhlaba.
“Umbuso weMunhumutapa wawungumgogodla kwezokuthengisela eAfrica. Zinengi izifundo esingazithatha ekukhuleni kombuso lo mayelana lokuphathwa kombuso, ubudlelwano lamanye amazwe, umnotho kanye lezokholo. Izifundo lezi zizasikhokhela esikhathini esiphila kuso,” kutsho uMongameli welizwe.
“Kungenxa yalesi isizatho, sihlonipha imbali le, njalo sifuna ukulondoloza amasiko ethu anothileyo, esikuthi yiMunhumutapa Day.”
Mayelana lokuthuthukiswa kwabasakhulayo, uMongameli uthe uhulumende uzaqhubeka esenza kube lendawo evuma ukuthi abasakhulayo babe yingxenye yokuphathwa kwelizwe kanye lokuthuthukiswa komphakathi.
Ukhuthaze abasakhulayo abanengi ukuthi bangene kwezokulima, ekuthuthukiseni uhlonzi kumpahla ezehlukeneyo ezilinywayo lezenjiwayo kanye lasekusebenziseni ubuchwepheshe bakulezinsuku ekucubunguleni okutshiyeneyo eZimbabwe.
“Njengabasakhulayo, ukwenza okuhle kakhulu kuyingxenye yenu. Umoya wobuqhawe, kanye lobuntu benu bokungahlaliseki ekusunguleni izinto ezintsha, kudinga ukuthi lingaze lasuthiseka ngokwenza okujayelekileyo.
“Sebenzani gadalala lenze imali. Kumele libe lesibindi, lizame izinto ezintsha njalo lingesabi ukwenza amaphutha ohambeni lwenu lokuvula izindlela ezintsha,” kutsho uMongameli welizwe.
UMongameli uncome iMunhumutapa Housing Scheme ngokunika abasakhulayo amathuba okuba lezindlu zabo, waphinda wancoma ohulumende bezabelo ngokupha umhlaba wokwakhiwa kwalumsebenzi.
Uthe iPresidential Youth Empowerment Fund isincedisa abasakhulayo ukuthi baqale njalo bakhulise amabhizimusi abo, abanengi babo asebenza kuhle kwezokwemba kanye lokwenza impahla ezilohlonzi.
