Online Reporter
Charles Dube
Isandiso esivela kwamanye amabizo ngezigaba zawo
Siqala lapho esicine khona kuviki edlulileyo.
Kusigaba 2 ibizo abantu, isandiso sendawo ngu –ebantwini. Kusigaba 2a ibizo ogogo, isandiso sendawo kubogogo. Isigaba 3 ibizo umuthi, isandiso sendawo emuthini. Isigaba 4 ibizo imithi, isandiso sendawo emithini. Isigaba 5 ibizo ilizwi, isandiso sendawo –emazwini.
Isigaba 6 ibizo amazwi, isandiso sendawo emazwini. Isigaba 7 ibizo isilo, isandiso sendawo esilweni.
Isigaba 8 ibizo izilo, isandiso sendawo ezilweni. Isigaba 9 ibizo inja, isandiso sendawo enjeni.
Nanku esikuphawulayo: Unkamisa osekuqaleni siyamguqula kuwo wonke amabizo. Nxa sisakha isandiso sendawo siqalisa ngonkamisa –e- kuzo zonke izigaba ngaphandle kwesigaba 1a lesigaba 2a.
Zona-ke ziqalisa ngo-ku-. Nxa sihlolisisa izandiso lesi sizabona ukuthi kulenguquko eyenziwe ekucineni kwebizo kuzo zonke izigaba ngaphandle kwesigaba 1a lesigaba 2a.
(a)Wonke amabizo acina ngo-a loba –e ajobelela u-eni esikhundleni sabonkamisa laba. (b)
Endaweni kankamisa –i osekucineni kwamabizo athize ajobelela u-ini. (c) Amabizo acina ngo-o ajobelela –weni nxa sisakha izandiso zendawo. Endaweni kankamisa –u osekucineni sijobelela u-wini.
