Online Reporter
Fungai Muderere
INTSHANTSHU zomdlalo we-pool ilizwe lonke zizathatha ama-cue stick azo, zingene indlela eqonda enkundleni yeZimbabwe International Trade Fair koBulawayo, kubangwa isicoco esikhulu somncintiswano weCarling Black Label.
Umncintiswano lo uqhutshwa ngoMgqibelo, lapho ilizwe elizabe lilungiselela ikhefu lamaqhawe enkululeko, iHeroes Day leDefence Forces Day.
Kubikwa ngemva kwemidlalo le, kuzenziwa umqhudelwano weBulawayo Provincial Pool Association (BPPA) Heroes Cup, andubana kuqalwe imidlalo yenhlandla lesibili leBulawayo Provincial Pool Association (BPPA) Laegue.
Kumbiko wakhe ngomncintiswano weCarling Black Label, umqondisi weZimbabwe Pool Association (Zipa) uWellington “Dewa” Chikasha uthe lonyaka kwengezwe ubungcitshi njalo umncintiswano mkhulu.
“Sizahlangana njalo kumncintiswano wethu omkhulu oweCarling Black Label lapho okuzadlala khona intshantshu ezikhethwe ukuthi zimele izabelo. Lonyaka sisesigodlweni saMakhosi, koBulawayo enkundleni yeZimbabwe International Trade Fair.
“Silokuthaba ukuphenduka kulindawo, esiyibiza ngokuthi ilikhaya elikhulu lomdlalo we-pool. Umdlalo wethu usukhule okumangalisayo koBulawayo, osekudale ukuthi ukhwabithwe lakundawo eziseduzane. Siyakubongela lokhu. Ngokunjalo, sikhangelele ukuthi intshantshu zethu zilungiselele, zisiphakulele ukudla kwamehlo koBulawayo. Ukuze senelise ukuphatha umncintiswano omkhulu, owahluke kuleminye, siqhatshe onompembe abangamatshumi amabili njalo kuzadlalelwa ematafuleni edlula itshumi lasithupha,” kutsho uChikasha.
Kusenjalo, abadlali abakhethwe ukuthi badlalele isabelo sakoBulawayo babike ukuba bazimisele ukuthi bajabulise abalandeli ekhaya. Kulesi isabelo, imidlalo yokukhetha abadlali iqhutshelwe enkundleni yeFast Cash, Golden Pillars laseQueens Sports Club.
Isikhulumi seBPPA u-Osborne-Wells Dziko uthe: “Sifuna ukuthi umvuzo wakuqala uthathwe ngabadlali bethu kuwo wonke amahlandla. Abadlali abakhethiweyo bazimisele ukusijabulisa.
“Sibonga ukuthola usekelo kunhlanganiso yeZimbabwe Pool Association ngokuvumela ukuthi imidlalo yeCarling Black Label iphenduke edolobheni lethu, koBulawayo.”
Abanye abadlali bakoBulawayo okubekwe kibo amathemba nguStephen Paswani, Norman Moyo, Sindiso Sibanda loVigilant Ndlovu kuhlandla labesilisa.
Kwabesifazane kuloThandekile Sibanda, Aldred Nogate Ndlovu, Robyn Nikiforos, uPlaxedes Musoveri labanye abakubanga elifanayo.
Kulabo asebebizwa ngokuthi ngama-veteran kuloNomore Muzvidziwa, Donald Wadawu, Dziko, Farai Nyandoro, Tapera Shumbanhete loTichaona Dzawo.
