admin
YiNthatheli kaMthunywa
UMKHULU wabaqeqetshi beHighlanders uCosmas “Tsano” Zulu uqina esiyaphambili ngenyathelo lakhe lokuthi izithombe zalabo abake badlalela ithimu ziphanyekwe e-club house yaleliqembu.
UZulu, okhulume ezitshayela izandla ngokuncedisa ukuthi iBosso iqede isizini kakuhle, uthe umlandu lo bawethesa ikhomithi kaPeter Dube ukuze kwaziwe ukuthi yibaphi abadlali abenza iBosso yaba yithimu enkulu kuleli lamhlanje.
Umqeqetshi lo, odume ngelithi “Tsano” ubikele iphephandaba likazulu ukuba usebambane labanye abadlali abadla ubhedu. Uthe yena labanye abadlali sebezaqala kakutsha ukukhankasela ukuthi izithombe zabo zibonakale e-club house.
UZulu uthe ulokudana ukuthi ikomithi ekhokhela iHighlanders okwamanje iyehlulekile ukufaka imbali yeqembu kuzulu.
Uthe ukhala kakhulu ngokuthi imbali yabo njengabadlali iphelela kumaphephandaba kuphela kodwa emahofisini eqembu akula zithombe zabo ezichaza sobala imvelaphi yeqembu.
Isisusa sesikhalazo sabadlali bendulo siphuma ekuthini i-club house yethimu yezwe lonke igcwele imfanekiso yotshwala kungela ngitsho lowodwa oweqembu.
Leqembu lesizini esanda kuphethwa alila sithombe kulindawo.
UZulu utshele iqula lethimu yentatheli ukuba ukuswelakala kwemifanekiso lembali e-club house kuyabayangisa njalo kuyabalulazisa emphakathini.
“Ngubani ozavuma ukuthi uTsano wake walikhaba kuBosso? Akula sibili ngoba awusoke uhlangane lomfanekiso wethimu engangiyidlalelayo.
“Kwamanye amathimu nxa usithi ungena e-club house uthola ubucwazicwazi bezithombe zabadlali, lawe uzifundele wedwa ukuthi ithimu le imi njani.”
UZulu labanye abadlali bendulo bathe bafuna ukuthi nxa bexoxela abazukulu ngembali yabo kunguqu benelise ukubasa e-club house bazibonele mathupha.
“Ngake ngangena leqembu labafana engangilabo eBotswana ngaphenduka isithutha sendoda. Abafana bangibuza ukuthi njengoba ngadlala kuHighlanders, pho umfanekiso wami ungaphi?
“Kwangizwisa ubuhlungu kwaphinda kwangivusa ingqondo ukuthi siqalise ukuhlanganisa imbali engeyethu njengabadlali hatshi ukukhulunyelwa ngabanye abantu.”
Abanye abadla ubhedu okukhanya besekela umbono kaZulu babalisela uDouglas “British” Mloyi, uEnerst Mapepa Sibanda, uAmini Soma-Phiri, uDazzy Kapenya, uNetsai Moyo labanye.
Online Reporter