admin
Johas Moyo
INHLANGANISO yeLivestock Production Department esabelweni seMatabeleland North ikhuthaza abalimi ukuthi bafuye inkukhu zesintu ngoba isinanzelele ukuthi balutshwana abalimi abazifuyayo.
UMnumzana Mike Nemashakwe onguLivestock Production Officer esabelweni seMatabeleland North ukhuthaze abalimi ukuthi bafuye inkukhu zesintu ngoba zilula ukunakekela njalo kazidingi mali enengi ukuthi umuntu azifuye.
“Inkukhu zemakhaya kazihluphi ngitsho ukufuya njalo lokudla ezikudlayo akuduli ngitsho ngoba umlimi angazipha ukudla kwesintu okufana lenyawuthi, amabele, sunflower, umumbu kanye lomuhlwa otholakala ezidulwini.
“Inkukhu lezi ziyenelisa ukuthi ziziphandele ukudla. Inengi lazo ziyakhula kazidingi mithi ukuthi zingezelelwe ukukhula njalo kazihlaselwa yimikhuhlane mahlayana nje,” kutsho uMnu Nemashakwe.
Uqhubekele phambili uMnu Nemashakwe ekhuthaza abalimi ukuthi bafuye inkukhu zesintu ngoba zilenyama emnandi njalo ethandwa ngabantu abanengi ngoba inambitheka ukwedlula inyama zenkukhu zesikhiwa.
“Sikhuthaza abalimi ukuthi bafuye inkukhu zesintu ngoba inyama yazo kayitholakali, lokhu sokwenze ukuthi inyama yenkukhu zemakhaya ibelentengo ephezulu kungakho sikhuthaza abalimi ukuthi kabafuye inkukhu zohlobo lolu. Lokhu kuzakwenza ukuthi abalimi bazuze imali njengoba inengi labantu beyithanda njalo beyidinga kakhulu.
“Inkukhu zemakhaya ziyanda ngoba ziyabekela njalo lamaqanda akhona umuntu uyenelisa ukuwathengisa,” kuphetha uMnu Nemashakwe.
Online Reporter