admin
YiNtatheli kaMthunywa
UBRENDAN Taylor ukaputeni weqembu lesizwe lekhilikithi uthe kade iZimbabwe yadelelwa kulumdlalo ngakho bazakulungisa lokhu ngokubhaxabula iBangladesh emdlaweni weT-20.
IZimbabwe inxuswe yiBangladesh ngenyanga ezayo.
UTaylor oleminyaka yokuzalwa engu-28 ubikele iphephandaba likazulu kuliviki ukuthi yena labafana bakhe bafuna ukubonisa abalandeli bekhilikithi ukuthi bayazi abakwenzayo kulumdlalo.
Uthe bazaqala ngokutshaya iBangladesh egumeni layo ngoba ababoni bunzima kulithimu.
“Okwakhathesi siphakathi kwamalungiselelo omdlalo wethu omkhulu weT-20 leBangladesh njalo sisebenza gadalala silolongela ukuthi senze ubungcono bethu emdlalweni lo,” kutsho uTaylor.
Loba ukaputeni efunga kanje, kuyaziwa ukuthi iZimbabwe iyaxega njengoba abadlali bedonse inyanga bekhalele umdlalo. Inhlanganiso yeZimbabwe Cricket ikweleda abadlali iholo labo elinengi. Taylor ukhangelelwe ukukhokhela ithimu ehlangene abadlali abasacathula lalabo abalesikhathi bemela iZimbabwe ababalisa uChristopher Mpofu, uElton Chigumbura loHalmiton Masakadza.
Ukaputeni lo sowadlala imidlalo yeT-20 amahlandla angamatshumi amabili lantathu. Umdlali lo uhamba ezithende Ray Price umdlali wekhilikithi owaba lodumo eminyakeni edluleyo njalo wacina esedlala laku Indian Premier League (IPL).
“Ngizwa ngilokujabula okukhulu ukuba yingxenye yalumncintiswano, ikakhulu ukuba ngukaputeni njalo. “Ngifuna ukwethulela ilizwe lakithi inhlonipho, ngokunqoba emdlalweni lo,” kuqhuba uTaylor.
Online Reporter