admin
Johas Moyo
INHLANGANISO yeAgritex isikhuthaze abalimi ukuthi baqalise ukulima ezivandeni ngoba sesiphelile isikhathi sokulima emasimini laloba nje izulu lilokhe lisina.
UMnumzana Dumisani Nyoni onguProvincial Agritex Officer uthe umumbu osemasimini endaweni ezinengi sowatsha kungakho abalimi bangasizakala nxa bangalima ezivandeni kusesemanzi ukuze bathole inzuzo engcono.
Uthe abalimi bangathatheki balime emasimini ngoba izulu leli lilakho ukuthi lihambe litshiye izilimo zingakavuthwa kukanti bangalima izivande balakho ukuthi bazithelele lanxa izulu lingahamba.
“Sikhuthaza abalimi ukuthi basebenzise amanzi onala amalutshwana angenileyo emadamu lemachibini ukuthi baqalise ukulima izivande zabo.
“Bangaqali ukulingeka ngezulu elikhona ngoba lizatshiya emasimini kusitsha njalo alaziwa ukuthi lizahamba nini okufana lokuthi abalimi balakho ukudlalisa inhlanyelo yabo nxa bethe balima emasimi njalo.
“Abangakwenza yikulima imihlobo etshiyeneyo yemibhida, amatamatisi ihanyanisi kanye lekhabitshi ukuze imuli zabo zithole ukudla kanye lezinye izilimo eziphangisayo ukuvuthwa,” kutsho uMnu Nyoni.
Uqhubekele phambili uMnu Nyoni ekhuthaza abalimi ukuthi bathathe ukulima izivandeni njengebhizimusi hatshi ukulimela nje ukuthi bazidlele lezimuli zabo.
“Sikhuthaza abalimi ikakhulu abantu abatsha ukuthi bathathe ezokulima ezivandeni phezulu ngoba akula lutho emasimini lonyaka ngokunjalo abanye bangondla izimuli kanye lokuthenga amabele ngemali abangazithola ngokulima izivande.
“Abalimi kabadinge ulwazi kubalimisi abaseduze labo ukuze belulekwe kuhle ngezindlela zokulima izivande, ukufafaza imithi kanye lokuvikela izilimo zabo kuzibungu lamagcikwane atshiyeneyo,” kuphetha uMnu Nyoni.
Online Reporter