admin
IKHEFU lePhasika liqakatheke kakhulu kumakholwa. Liqala kusasa. Thina njengoMthunywa sibona kuqakathekile ukuthi uzulu wonke olikholwa asukumele phezulu lamuhla atshengise ukubonga iNkosi uJesu ngomsebenzi omkhulu awenza esiphambanweni.
UJesu indodana kaMdali njengokusembhalweni ongcwele wabethelwa esiphambanweni ngoLwesihlanu, walala emathuneni amalanga amathathu waze wavuka emadabukakusa ngelanga langeSonto.
Ukufa kwenkosi uJesu kwaletha impilo entsha kumakholwa nanku phela kwabanikeza amandla okunqoba yonke imisebenzi kasathane kanye lengilosi zakhe zobunyama. Lamhlanje sikholwa ukuthi uJesu uhlezi esihlalweni sobukhosi loyise, njalo nguye osebusa ezulwini, emhlabeni kanye laphansi komhlaba laselwandle.
Yikho thina njengephephandaba likazulu sikhuthaza wonke amakholwa kanye labangakholwayo ukuthi kuleli ikhefu eliqala kusasa, abahlangane badumise uNkulunkulu. Babonge ngempilo zabo ngoba kungasilozwelo lwakhe kanye legazi lakhe elisivikela kumitshoko kasathane ngabe abanye kade sadlula kulumhlaba.
Abangamaziyo uKhristu sibakhuthaza ukuthi lamuhla baqale ukumamukela empilweni zabo ngoba nguye kuphela olempilo enaphakade. Konke lokhu kwenzeka ngenxa yokufa kukaJesu esiphambanweni.
Lelikhefu liqakathekile ukwedlula iKhisimusi ngoba ukufa kukaKhristu yikho okwabhidliza amandla esitha emhlabeni wonke jikelele, hatshi ukuzalwa kwakhe. Usathane into emqoka ayengafuni ukuthi uJesu ayenze yikuthi ayesifela esiphambanweni. Kodwa ngokusithanda umsindisi wasifela, wasihlenga kulaka oluzayo.
Yikho lathi sikhuthaza uzulu ukuthi abonise ukubonga kwakhe kuMvelinqangi ngokuya endlini yeNkosi kulelikhefu.
Leli lithuba elihle njalo elokuthi lawe loba uphila impilo ekhohlakeleyo, ungabe uyisidakwa ebesesize sinuka njengebhawa, ungumthakathi, ulisela, mamkele uJesu lamuhla akugezise ngegazi lakhe elilamandla.
Lithuba elihle Mthwakazi omuhle leli hlezi elizayo ungaliboni. UMthunywa laye ubonga uJesu ngomusa kunye lothando lwakhe aluveza ngokusifela esiphambanweni. Zulukandaba sikufisela iPhasika enhle njalo elezibusiso ezivela kuMdali wakho konke.
Online Reporter