Vusumuzi Dube
Nkosilathi Sibanda
UKWANDA kwama-tuck shop angekho emthethweni edolobheni leHwange, eMatabeleland North, sekuphazamise amabhizimusi abhalisiweyo, osekudale ukuthi ikhansili yakulindawo ibeke isijeziso.
IHwange Local Board (HLB) kumaviki adluleyo ibeke isimemezelo sokuthi izaqala ukuvala ama-tuck shop asezindlini zabantu lama-kiosk ekhansili asetshenziswa ngaphandle kwezivumelwano eziqondileyo.
IHLB ithe ibeka lesi isijeziso ngemva kokuthola isikhalazo kubosomabhizimusi ababhalise okusemthethweni abaveze ukuthi babhekane lokuncintisana lama-tuck shop njalo inzuzo yabo isiphansi.
Esinye isisusa sodaba kubikwa yikuthi abanikazi bama-tuck shop ababhadali umthelo kukanti osomabhizimusi bayabhadala.
Kumbiko wayo, iHLB ithe uhlelo lokuvalwa kwalabo abangalandeli umthetho, luhlose ukukhuthaza ukusebenza kuhle kwamabhizimusi.
“Umsebenzi lo uqondiswe ekuqiniseni imithetho yekhansili, ukukhuthaza ukuthengiselana lokuthengisa ngendlela enhle lokuqinisekisa ukuthi wonke amabhizimusi asebenza ngaphansi komthetho,” kubika iHwange Local Board.
Ama-tuck shop angasebenzi ngokusemthethweni lama-kiosk angaqondanga, ehlisa amathuba okuphumelela kwamabhizimusi aqondileyo.
Ukusebenza okunje kuphinda kulethe ingozi emphakathini, kuphazamise lokuhlelwa kwemisebenzi kazulu,” kubika iHwange Local Board.
Ikhansili le icele bonke abaqhuba amabhizimusi ukuthi bahlele umsebenzi wabo ngokuthola amachence, izivumelwano zokuhlawula irenti kunye lemvumo efunekayo ukuze benqabele izijeziso.
“IHwange Local Board izimisele ukuhlala ikhuthaza njalo incedisa ukuthi kube lesimo esivumela ukuqhuba amabhizimusi ngendlela eqondileyo, ehlonipha umthetho njalo esekela ukukhula komnotho walindawo,” kutsho ikhansili.
Online Reporter