Online Reporter
Bongani Ndlovu
AMABANDLA okholo lwesiKristu akoBulawayo azahlangana enkundleni yeHartsfield ngoMgqibelo emthandazweni omkhulu wokukhonza uNkulunkulu, ohlose ukuqinisa ukubambana phakathi kwamaKristu edolobheni.
Umhlangano lo obizwa ngokuthi Stadium Worship uzaqhutshwa ngaphansi kwesihloko esithi: “Idolobho Elilodwa. Ilizwi Elilodwa. Ibizo Elilodwa.” Uzaqala ngehola lesihlanu ntambama uphele ngehola lesitshiya galolunye ebusuku.
Ukuhlangana kwamakholwa lokhu kuza ngemva kwenyanga ezimbalwa amabandla ehlukeneyo ekhuleka, eqhuba imihlangano yokukhonza lokulolonga ukucula. Kwenziwa njalo lemihlangano yabakhokheli ngenjongo yokwakha ukubambana phakathi kwamaKristu.
Abaqoqi bomcimbi wokholo lo, batshele iphephandaba likazulu ngoMvulo kuliviki ukuthi sekube lemihlangano yokukhuleka engaphezu kwengu-100 leminye imisebenzi ebihlose ukuhlanganisa amabandla ekukhonzeni uJesu.
“Umkhankaso weKingdom Nation lawo ubelendima enkulu ekukhuthazeni lolu hlelo ngokwabelana ngemilayezo lendaba ezilethe ithemba enkundleni zokuxhumana, kuYouTube lasemisakazweni,” kutsho umbiko lo.
Kubikwa iStadium Worship kayisoze ibe ngeyokuphakamisa ibandla elilodwa, umuntu oyedwa kumbe abaculi abathile.
Omunye wamalunga eqembu elihlela iStadium Worship, uTommy Deuschle, uthe umcimbi lo awuhlosanga ukwakhela umuntu loba inkonzo ethile inkundla.
“Siyakholwa ukuthi uNkulunkulu ulecebo loBulawayo njalo ubona ibandla lakhe lilinye,” kutsho uDeuschle.
“Lokhu akugxilanga ekuphakamiseni inkonzo ethile. Kulunxuso nje lokuthi ibandla lihlangane kuJesu, likhulekele idolobho lethu njalo livume ndawonye lisithi: Umbuso wakho kawuze, intando yakho kayenziwe.”
