Bunjiwe Mkwananzi
Sikhumbuzo Moyo
INHLANGANISO yamabandla okholo, iZimbabwe Heads of Christian Denominations (ZHOCD), koBulawayo isiqalisile ukwamukela izizalwane zakuleli ezivela eSouth Africa, lapho enika khona indawo yokulala okwesikhatshana lokudla ebandleni le-United Congregational Church of Southern Africa (UCCSA) eNjube.
UBishop Lazarus Khanye, oqondisa loluhlelo ebambisene loBishop Senda Ngulube, uthe sebamukele abantu abaphezulu kwe-600, inengi labo selidlulele ezigabeni ezitshiyeneyo zelizwe.
Uthe abanengi babo baya eMatabeleland North leMatabeleland South, lanxa kulabanye abaya kwezinye izabelo.
“Sibone kufanele ukuthi lathi sincedise sisekele uHulumende ngendlela esenelisa ngayo. Ngosizo lwabaxhasi, siyenelisa ukubapha ukudla lokubancedisa ngemali yokuhamba ukuze bayefika lapho abaya khona,” kutsho uBishop Khanye.
Uthe indawo ye-UCCSA isebenza ngokubambisana lengatsha zikaHulumende ukuqinisekisa ukuthi bonke ababuyayo bayabhaliswa njalo bathole usizo olufaneleyo bengakaqhubeki ngohambo lwabo.
“Nxa befika bayabhaliswa yiziphathamandla zikaHulumende. Sila-madeski amane. Elokuqala ngelokubhalisa imininingwane yabo. Abalabantwana besikolo baphiwa incwadi ezizabanceda ukubabhalisa kuloba yisiphi isikolo abasikhethayo eZimbabwe.”
Uphinde wathi kulendawo yezempilakahle elezisebenzi zempilakahle njalo sekumiswe ikilinika encane esebandleni ukuze incede labo abadinga ukwelatshwa loba ukuhlolwa.
UBishop Khanye uthe ukungenela kwamabandla kusekela imizamo kaHulumende yokuqinisekisa ukuthi izizalwane ezibuyayo zamukelwa ngenhlonipho njalo zithola usizo lokuqalisa impilo kakutsha.
“Sifuna ukuqinisekisa ukuthi kakho olala elambile loba oswela usizo ngesikhathi esesendleleni. Siyabonga kubo bonke abasixhasayo ngokudla, impahla, ingubo lezinye izinto eziqakathekileyo.”
NgoMvulo ekuseni, intatheli yeZimpapers ibone ibhasi ifika e-UCCSA ithwele abantu abanengi abavela eSouth Africa. Phakathi kwabo bekulabesifazane, abantwana labadala, abamukelwe kakuhle ngaphambi kokubhaliswa.
Abanye baqondiswe endaweni yokuhlolwa impilakahle, kuthi imuli ezilabantwana besikolo zanikwa ulwazi lokuthi bangabhalisa njani abantwabazo ezikolo.
Amabandla aqhubeka enxusa abantu, amankampani ukuthi baqhubeke besekela loluhlelo ngokunikela abalakho.
derick.khumalo
Online Reporter