Nkosilathi Sibanda
NGENXA yokuthanda utshwala okwedluliseleyo, kulenye indoda yakoBulawayo esivinjwe ukuphinda itshayele imota impilo yayo yonke.
Umtshayeli lo, uTatenda Janasi oleminyaka engu-33 yokuzalwa, umiswe phambi komthethwandaba kamantshi koBulawayo ngecala lokungananzeleli emgwaqweni lokutshayela edakiwe.
INational Prosecuting Authority of Zimbabwe (NPAZ) ibike ukuthi mhlaka 13 Mpandula 2026 emgwaqweni uNketa Drive eduzane kwako-Chicken Corner, uJanasi wayetshayela igonyethi i-Elcher Pro 1075, wangqikila imota encane yohlobo lweToyota Vitz eyayimile.
Ukutshayeka lokhu kwabangela ukufa kwesibane saphambili kanye lokufa kwemota kodwa akulamuntu owalimala kungozi le.
Ekuhlolisiseni kwamapholisa kwatholakala ukuthi uJanasi wayedakiwe futhi elesilinganiso se-344 millilitres phakathi kwesilinganiso se-100 millilitres egazini, okungaphezulu kakhulu kwesilinganiso se-150 millilitres esisemthethweni.
Ekuthonisisweni, kucala lokutshayela okungelananzelelo, uJanasi ujeziswe ukuthi abhadale i-US$130 kukanti angehluleka ukubhadala imali le uzavalelwa ejele inyanga ezimbili.
Kuthi kucala lokutshayela edakiwe, ugwetshwe inyanga ezingu-24, wabuye wavinjwa ukubuye atshayele amagonyethi futhi okwempilo yakhe yonke.
I-NPAZ ithe isigwebo lesi siveza ububi bokutshayela umuntu edakiwe, ikakhulu kubatshayeli bezimota ezinkulu, okungaba yingozi enkulu kwabanye abasebenzisa imigwaqo nxa bengananzelelanga.
Ikhuthaze abatshayeli, ikakhulu abezimota ezinkulu, ukuthi baziphathe kuhle emgwaqweni.
