Nkosilathi Sibanda
AMAPHOLISA akuleli asecele uzulu ukuthi ancedise ngolwazi olunganceda ukuthi kutholakale abetheswacala abahlanu abadingwa ngamapholisa eZambia ngamacala agoqela udlakela, ukubulala, ukutshontsha lobugebenga obenziwa ebulenjini.
Kumbiko okhitshwe mhlaka 14 Mfumfu 2026, amapholisa athe asebenzisana lamapholisa eZambia i-Zambia Police Service ukulwisana lobugebenga obudlulela kumingcele yamazwe.
Amapholisa athi abasolwa laba kucatshangelwa ukuthi baseZimbabwe njalo badinga uncedo lomphakathi ukuze kutholakale ukuthi bangaphi, kulandelwe umthetho ngendlela eqondileyo.
Amapholisa abike ukuba ukusebenzisana lokhu kuyingxenye yemizamo yokuqinisa ukusebenza kwamapholisa emazweni womabili lokulwisana lobugebenga obuthinta amazwe atshiyeneyo.
Abasolwa laba nguEmmanuel Banda, owaziwa njalo ngeluthi Jay Jay, ofunelwa amacala agoqela udlakela, ukuzama ukubulala lokubaleka ezandleni zamapholisa.
Owesibili nguKaizar Peter Zulu, ofunelwa icala lokutshintsha kumbe isimo semota ngendlela engavunyelwa ngumthetho lokwethusela ngodlame.
Owesithathu, ngu-Enock Mwanza odingelwa amacala okungena ebulenjini engelamvumo lodlakela ebulenjini. Omunye olecala elifanayo nguRobert Ngu’ni.
Owesihlanu nguSusan Chileshe laye ofunelwa icala lokusebenzisa ubulembu lenhlelo zamakhompuyutha.
