Vusumuzi Dube
YiNtatheli kaMthunywa
UMBUKISO omkhulu wezamabhizimusi oweZimbabwe International Trade Fair, (ZITF) uphethe ngoMgqibelo koBulawayo, lapho osamabhizimusi bakuleli ababukise kuwo ababike ukuba babe lengxoxo ezilentuthuko njalo bakhe ubudlelwano lamankampani akuleli kunye lavela kwamanye amazwe.
Babike ukuba umbukiso weZITF ubanikeze ithemba lokuthi amabhizimusi abo azakhula, kube sekuthuthuka umkhonomi welizwe.
NgoLwesine, inkundla yeZITF ivulelwe umphakathi
Bekugcwele abantu belande ukuzobona lumbukiso kunye lokuba yingxenye yokuvulwa kwayo okusemthethweni nguMongameli weBotswana uDuma Boko.
Abakhokheli bamabhizimusi bathe bayakholwa ukuthi umnotho welizwe uyathuthuka kancane kancane, njalo umbukiso lo ubanikeza ithuba lokuhlangana, ukwabelana imibono lokwakha ubudlelwano obutsha.
Lonyaka kwande labosomabhizimusi abasakhulayo. Intsha enengi ibonakele iletha imibono emitsha, ikakhulu kweze-technology, ukulima lokuthengisa.
Lamabhizimusi aqhutshwa ngabesifazane abe yingxenye enkulu yombukiso.
Omunye usomabhizimusi wesifazane, uNkosikazi Mercy Masina, obebukisa engaphansi kweZimTrade uthe:
“Umbukiso lo usinika ithuba okutshengisa esikwenzayo lokuthola abathengi abatsha.”
Online Reporter