admin
IZAKHAMIZI zeGwanda zikhathazekile ngokwanda kwamasela enkomo kulesisisigaba osokusenza abantu balahlekelwe ngumthombo wabo wokuziphilisa kanye lokwenyusa ezomkhonomi kulindawo eyaziwa ikakhulu ngokufuya inkomo.
Ukufuya inkomo kuyinsika yempilo yabantu besabelo seMatabeleland South, njalo abantu basebenzisa izifuyo zabo ekulimeni, ukuze bathole umquba kanye lokuthi bathole ukudla njengezimuli.
Izakhamizi zikhalaza ngenkomo zazo ezicatsha kusa kwamalanga okucatshangelwa ukuthi zitshintshwa ngamaqembu atshiyeneyo asebenzelanayo.
Abalimi bakhalaza ngokuthi amapholisa sokumele abophe ziqine ngoba bangaphelelwa yizifuyo basale bempofu.
UMnumzana Jeptha Ngwenya oyisakhamuzi uthe kulukhuni ukulahlekelwa yisifuyo mahlayana nje wena usazi ukuthi wasisebenzela.
“Kubuhlungu njalo kulukhuni ukulahlekelwa yisifuyo ngoba sizisebenzela nzima, yizo inotho yethu thina abalimi.
“Okwenzakala lapha kumele amapholisa aphangise akumise ngoba ngibona angani kulamaqembu abantu asebenzelanayo asitshontshela inkomo zethu njalonje.
“Isimanga yikuthi ababotshwa, okwenza sikhathazeke njengezakhamizi,” kutsho uMnu Ngwenya.
UNkosikazi Thembani Ncube uthe yena ulahlekelwe zinkomo ezintathu lonyaka.
“Akungiphathi kahle ukuthi ngisebenza gadalala besekusiba labantu abafika bazithathele inkomo zami. Ngikhuluma nje lonyaka ngilahlekelwe zinkomo ezintathu, kubuhlungu ngizwa angani inhliziyo yami ithonta igazi.
“Amapholisa kawababophe laba abasitshontshelayo.”
Ngokutsho kweZimbabwe Republic Police, kulamacala okutshontshwa kwenkomo angu-798 abikwayo eGwanda kanye laseBeitbridge kusukela ngoZibandlela kusiyafika uMpandula lonyaka kukanti kwatholakala inkomo ezingu 315 kwabotshwa abangu-88.
Amapholisa ahlala ekhuthaza abalimi ukuthi bakhangele izifuyo zabo, bazifake umtshiso kanye lokubikela amapholisa nxa kuyikuthi sebetshontshelwe isifuyo sabo.
Online Reporter