Online Reporter
YiNtatheli kaMthunywa
INDUNA yesigabeni seBinga, uDobola isikhuthaze izakhamizi ukuthi zibike wonke amacala okudlwengulwa kwabantwana emapholiseni ukuze bengabulali ikusasa labo.
Induna uDobola iveze lokhu ngemva kokunanzelela ukuthi amacala amanengi okudlwengulwa kwabantwana yizihlobo eziseduzane ayagqitshelwa, okwenza labo bantu baqhubeke ngempilo zabo kukanti impilo yomntwana iyabe isiphambanisekile ngoba kwesinye isikhathi uyabe esezithwele.
Ikhuluma lentatheli induna uDobola ikhuthaze izakhamizi zonke ukuba ziziphe umlandu wokuvikela abantwana.
“Siphila esikhathini esibi lapho othi uhlezi lesihlobo kanti sihlukuluza umntanakho ungelalwazi. Kwesinye isikhathi kuthi kungaphumela egcekeni liqhubeke likufihla linganakaneli umntwana eselibulele ikusasa lakhe.
“Umuntu engadala icala kabotshiswe aye ejele. Manengi amacala engiwamukelayo lapha njengenduna kuthiwa umntwana usezithwele kuthi sokulandelelwa kutholakale ukuba yisihlobo ebesihlukuluza umntwana kodwa amalunga emuli angazihluphi ngokuyabika emapholiseni ngoba bevikela imuli bakhohlwe ngomntwana,” kubika uDobola.
Uqhubekele phambili ebika ukuba wonke umzali ulomlandu wokuvikela abantwana abangaphansi kwakhe.
“Umzali wonke kumele aziphe ithuba lokuhlala labantwana bakhe phansi ababuze ngokubakhathazayo, lokhu kuzenza lalapho sebehlukuluzwa bangesabi ukubatshela.
“Kubuhlungu ukuthi uyinkokheli uzwe kuthiwa umntwana uyahlukuluzwa ngokocansi kodwa abazali bethule ngoba besidla kulowo ohlukuluza umntwana. Ngokunjalo ngikhuthaza wonke umuntu ukuthi amacala wonke awabikwe emapholiseni ukuze singabulali ikusasa labantwana,” kuphetha induna uDobola.
