Online Reporter
Ugwalo: Emfuleni wezinyembezi olwalotshwa nguEzekiel S K Hleza
Ophezulu Stinta
Siqhubeka ngogwalo lwethu olusichazela lubuye njalo lusivezele izinyembezi ezidalwa yibunzima bempi kanye lezigigaba zokuchitheka kwegazi. Yisifundo esikhulu kakhulu esihlangane laso egwalweni lapha esithi impi yebo iliwa ngezikhali kodwa ke kuyadingeka ubuchwepheshe bengqondo, izikhali zihlezi phansi, yikho ukuthi impi kuthiwe inqotshiwe.
Ngeviki edlulileyo, sitshiye uMaMoyo ethathwa emzini wakhe, sekumele azofakaza ngamehlo akhe langenhliziyo ephuphuma izinsizi ukuthi kubuhlungu kangakanani ukuzala uGwesela, umuntu ongumhlamuki.
Kwakungasomfanekiso omuhle ukubona uDingilizwe kanye lo Ndevuzegola bethutsha bephakathi kwezintambo bebotshiwe ngoba kwakusobala lasemehlweni engane, okwakuzalandela lapho kwakungomunye umfula wezinyembezi, hawu bantu, kodwa mhlaba kawunoni ngani, kawusuthi ngani izivunguvungu ezingaka lobuhlungu abantwana babantu abadlula phakathi kwabo.
Yakhuluma indoda yomlungu, uMackean, yawakhipha amazwi ngomlomo wayo acaca aba sobala lapho isitsho ukubana, bona bazimisele ukutshaya umbhobho, bacacade lonke igandanga, bawutshaye njalo igandanga leganga lize liphakamise izandla lithi libeka phansi zonke izikhali zokulwa.
Wayegwaba ngabafana bomlungu ababetshaya umbhobho kubencane indawo, aze atsho lokuthi kababizwe egangeni bazohlangana manqamu labafana abamhlophe bazibonele. Kodwa nxa sibuyela emuva siyakwazi, sikhumbula kahle ukuthi aphela amabhunu, oNdevu zegola labo Mgandane bewacacadile egangeni lapha, loba nje yena esekwenza sengathi abamnyama abakwazi khona nje ukukhokha inhlamvu ezimbili.
Konke lokhu kwakungamazwi okwethusela umphakathi ukuthi labazali nje bebodwa bakhuze abantwababo ukuthi bangalingi nje balokothe ukuyahlokoza inyoka emlindini, kukanti impi ayikhulunyelwa indoda ngendoda igoqa amabhulugwe igaxe ibhazuka ingene iganga.
Amazwi akhe kwakumele njalo ngombono wabo atshiye ehlabile okuzwayo enhlizweni zabantu abansundu. Masinyane oMgandane baqhutshwa bangeniswa endizamtshineni, kwafutha okwamagama kozeleyo ebona indodana iqhutshwa ngoba kwakusobala okwakuzabehlela phambili. Umtshayeli wendizamtshina wayidumisa indizamtshina, wayikhangela umaMoyo yaze yatsholobela, konke lokhu wayekubona sengathi nje liphupho ayengazi lokuthi wayengene njani kulo.
