admin
Thokozile Mbedzi
KULAMADODA amathathu elokitshini lePumula North koBulawayo agwaze enye indoda kubangwa intombi.
Kubikwa uZibusiso Mkhwananzi oleminyaka engu-30 owePumula North, uMeluleki Mhlalehwa oleminyaka engu-24 lo Professor Dube oleminyaka engu-26 owe Old Magwegwe bahlangana lomamangala abathi uthandana lentombi yomunye wabo ngakho bazamfundisa ukuba intombi yomunye kayikhonjiswa andubana bambhaxabule ngezibhakela bamgwaza ikhanda lelihlo.
Ekhuluma lentatheli kaMthunywa uBongani Khuphe uthe balokhu bemangele ngesenzo samadoda la.
“Asazi ukuthi kungani abathathu laba bekhethe ukuthelela umuntu oyedwa baze bamlimaze bebanga intombi ekhonjwe ngomunye wabo. Kukhanya vele amadoda la bekungabangwa intombi nje kuphela, ngoba bathe beqeda lapho babuye bamkhuthuza njalo izikhwama,” kutsho uKhuphe.
Uthe umamangala ulokhu elalisiwe esibhedlela seMpilo lapho elatshwa khona.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yabo njalo uthanda ukuxwayiswa uzulu ukuba bengabofaka umthetho ezandleni zabo.
“Thina njengamapholisa sixwayisa uzulu ukuba angabofaka umthetho ezandleni zabo kodwa kabazame ukudinga indlela eziqondileyo zokuba baxazulule ingxabano abayabe bebhekane lazo,” kuphetha uMnu Ncube.
Online Reporter