admin
YiNtatheli kaMthunywa
UKUVUMELA ukuthi kuxotshwe amaqembu amane kuligi yePremiership kuveze ukuba akhona amakhansila enhlanganiso yeZimbabwe Football Association akhankasela ukuthi iTsholotsho FC ibuyele ezikwakweni loba iqembu leli beselizama ukuthi lisinde kuligi yezinkulu kunguqu.
Iziqholo zeZhwane zinqobe iHighlanders 2-1 kumdlalo weCastle Lager ngempelaviki, okuzifake esimeni esihle sokuthi yenelise ukulwela ukugcina indawo yayo kuligi ephakemeyo.
Kodwa impumela yomhlangano weZifa ngempelaviki uveze ukuthi iTsholotsho ingahle ikhohlwe ngePSL ngesizini ka2017.
NgoMgqibelo odluleyo amakhansila eZifa enze inyathelo elitshiye abasekeli benguqu belengise imilomo.
Kumhlangano lo, iZifa ithe kumele kukhitshwe amathimu amane kuligi yeCastle Lager. Ngomnyaka ka2015, amakhansila eZifa ayethe avumelane ukuthi kuqalwe imidlalo yama-playoffs, ezenza ukuthi kuphuma amathimu amabili kuPSL kuthi lawo afuna ukungena ahlelwe kuma-playoffs la.
Amakhasila acabange ukutshintsha ingqondo lokhu kutsho ukuthi leZiqholo zeZhwane azilathuba lokuzinceda ukuthi zingaphumi.
Insindabaphenduli yeZifa le itshiya amaqembu ayisitshiya galombili esebunzimeni. Ngokuma kwelogu, iBorder Strikers isibuyela kuDivision One. ITsholotsho lemiklomelo engu-26, iChapungu (31) leTriangle (34) yizo ezilakho ukuphuma.
Kusasele imidlalo emibili kuphela, akwaziwa ukuthi eziphezulu kwazo iHwange (35), iBulawayo City (35) leHow Mine (35) zingenelisa ukuthi zinqobe.
Le yiyo inkinga esifakwe yiZifa kulandela ukufaka kwayo isinqumo sokuxotsha amathimu amane.
Kungabe kuzwisa ubuhlungu kubalandeli bayo iTsholotsho loba nje uMthunywa wakubika phambilini kusasele imidlalo ukuthi iqembu leTsholotsho liyavalelisa kuligi yenguqu ephakemeyo kulisizini.
Abasekeli beZiqholo lalabo abalandela amathimu asengozini yokuxotshwa abakhulume lephephandaba likazulu bathe kumele iZifa lePSL zilungisise udaba lolu, kubuyelwe kunyathelo lokwenza ama-play off.
Imzamo yokuxhumana lomgcinisihlalo weTsholotsho uMlamuli Phiri yehlule. Lomgcinisihlalo weZifa kulumhlubulo welizwe uMusa Mandaza walile ukwelula ngaloludaba.
“Kanti sekutheni? Mhlawumbe babone ukuthi iTsholotsho izanqoba yenelise ukubakhona ngomnyaka ozayo.
Abakulungise lokhu,” kutsho uGive Ndlovu osekela iTsholotsho.
UMilton Ntabende Luphahla uthe: “Besisithi kumbe ukusadalala kwaleliqembu sekuphelile ngokuwina kwethu phezu kweHighlanders. Vele besizanqoba. Kukhona okutshaya amanzi la.”
Ukungena kweTsholotsho FC ngo2015 kwaletha injabulo kubalandeli benguqu ilizwe lonke. Khathesi selizwisa usizi.
Umqeqetshi wayo uLizwe Sweswe ulokhe ezitshaya isifuba ngobuhle abenza ngokuphakamisa inguqu yeTsholotsho eyisa kuPSL.
Online Reporter