admin
YiNtatheli kaMthunywa
IZITHA zeBulawayo Chiefs bezisithi iqembu leli lithenge abadlali okwedlulisileyo, ngakho bazatatazela enkundleni, kukanti azibuzanga elangeni.
Kusukela ngomnyaka odluleyo, kusiyafika uZibandlela lonyaka, Amakhosi Amahle abegcwele indawo yonke ebuthelela abadlali, eguqula lendlela aqhuba ngayo ibhizimusi lomdlalo wenguqu.
Kwaqala ngokuza kwabaqeqetshi abatsha abakhokhelwa nguNilton Terreso lomhloli wempilakahle yabadlali uPouria Jarrahi.
Lokhu kwabayisibonelo sokuthi iBulawayo Chiefs ayilandanga ukuzozilibazisa nje emdlalweni.
Ngaleso isikhathi, amanye amaqembu kuligi yeCastle Lager ayegoqe izandla, elinde ukutshelwa ukuthi alungiselele.
Kwathengwa uKelvin Madzongwe, Obriel Chirinda, Obadiah Tarumbwa, Ian Nekati, Perfect Chikwende, Dela Akorli oweGhana, amaphahla uKelvin loElvis Moyo.
Sekuhlangene abadlali laba lalabo ababevele bekhona, uTerreso ubumbe iqembu elifunwa ukubonwa ngabathandi benguqu abakade besola indlela iChiefs ‘eyabuthelela’ ngayo abadlali.
Kuthe sekunjalo, ngeSonto iqembu leli lihle lakubeka mgceke ukuthi lihloseni.
Ligenqule intshantshu zeligi iFC Platinum ngokuyidla 2-0 kumdlalo obusenkundleni yeLuveve.
Kulumdlalo, uNorman Mapeza umqeqetshi weFC Platinum uthole umbhabhathizo, engakhangelelanga ukuthi enganqotshwa.
Kodwa imfihlo yalithimu ayikho kubadlali, ikundlela abadlali abaphathwa ngayo.
Abadlali beBulawayo Chiefs baphila impilo efiswa ngumdlali wonke.
Kumahlandla okulolonga baphiwa ukudla kohlonzi okuhlolwa ngodokotela bencedisana loJarrahi.
Lanxa besemakhaya abo, abadlali bayacetshiswa ukuthi balandele izeluleko zabodokotela ikakhulu ekudleni lokuziphatha.
Lesikhulumi seBulawayo Chiefs uThulani “Javas” Sibanda uyakutsho ukuba insika yikuqoqeka kweqembu.
“Sikusigaba sokwenza iBulawayo Chiefs ibe liqembu lokulandela kunguqu yeZimbabwe. Abadlali bethu baphethwe kuhle,” kutsho uSibanda.
“Nxa abadlali bethokoza ngaso sonke isikhathi ngendlela abagcinwe ngayo, balomlandu wokuthi baphendukise lokhu ngokwenza kuhle enkundleni.”
Kusenjalo, Amakhosi Amahle abika ukuba asevumelane lokusekelwa yinkampani yeMoors World of Sport (MWOS), inkampani egxile kwezokubhejwa kwezemidlalo etshiyeneyo.
Njengoba amehlo ethe nhlo kuleliqembu, umqeqetshi uTerroso uyazi mhlophe ukuthi ingqobe isikuye labadlali.
Utshele intatheli wathi inhloso yakhe yikwakha iqembu hatshi ukuthwala inkezo yeCastle Lager.
“Njengeqembu asigxilanga ekuthini siphumelele ngokuphangisa, esikwakhayo lapha yikuzama ukugcina impumelelo lokuthi singaphambuki kuligi.,” kutsho lumqeqetshi.
“Sifuna futhi ukwazi ukwakha isisekelo salokho okuze kuminyaka elandelayo iqembu libe lempumela ezwayo. Asifuni ukuthatha inyathelo elikhulu kakhulu ukuya phambili.”
UTerroso uncome abadlali bakhe wathi: “Ngiyaziqhenya ukuba labo.
Kufanele batshengise ukuthi yini edingekayo ukuze banqobe.
Ngiyaziqhenya ngabo.
Sithenge abadlali abayibo.”
IBulawayo Chiefs yasungulwa ngo-2012, iphuma kuMakhandeni Pirates.
Yangena kuligi kaDivision One, kumhlubulo ongezansi yelizwe ngesizini ka2013, andubana iqanse kuligi ephakemeyo eyeCastle Lager.
Iqembu leli selidlale laqethula phose wonke amaqembu okuthiwa makhulu kuligi yeCastle Lager.
Online Reporter