admin
Listen Ndlovu
ABAFUNDI besikolo seMagwegwe High School sebeqale ibhizimusi yokufuya inhlanzi ngenhloso yokuba bathole imali yokubancedisa ukuthenga ingwalo zabaswelayo kanye lokuthengela ababalisi ukudla.
Isikolo lesi siqale ibhizimusi le ngenyanga kaMpalakazi nyakenye ngemva kokunikwa inhlanzi lezi nguSenetha wakule indawo uMolly Ndlovu.
Omunye umfundi onguye uMkhokheli kuhlelo lolu, uShantel Chikuvadze uthe uSenetha Ndlovu nguye owasiza ukuthi aguqule impilo zabafundi abaswelayo.
“AbeZimparks bafika lapha bazosifundisa ngendlela okumele sigcine ngayo inhlanzi lezi ukuze zikhule kuhle.
“Sesifundisiwe kusukela ngenyanga kaMpalakazi besesilenhlanzi esizifuyayo khonapha esikolo,” kulandisa umfundi lo, uShantel.
“Ukugcina inhlanzi kulula kodwa kufuna umuntu ozinakekelayo.
Amanzi enhlanzi kumele ahlale etshintshwa ngoba nxa engekelwa engcolile inhlanzi ziyafa.
Okunye okudala ukuba inhlanzi zife njalo yikuzinika ukudla okungenelanga.
Ubike njalo ukuba inhlanzi azikhethi ukudla ezikudlayo.
“Inhlanzi zingathengelwa ukudla kwazo ezitolo okuthiwa ngama-fish pellets.
Nxa umlimi engela mali yokuthenga ukudla lokhu uyenelisa ukufaka umquba esakeni abesefaka emanzini lapho okulenhlanzi khona, umsobho womquba uyenza amawemusi okuyiwo aba yikudla kwenhlanzi.
“Umlimi nxa elembhida ayomisileyo etshiyeneyo ulakho njalo ukuyichola abesefaka emanzini inhlanzi zithole ukudla,” kuchaza uShantel.
Uphinde njalo walandisela uMthunywa ukuba bake baba lohlupha lokufa kwenhlanzi besaqala ukuzifuya.
“Sike sahlangana lobunzima ekugcineni inhlanzi. Inhlanzi zethu zazisifa ngoba sizipha ukudla okunengi ngakho amanzi ayeselokudla okunengi kakhulu okwabangela ukuthi zife.
Ukuze kungafi ezinye sangezelela emanzi echibini lenhlanzi ukuze amanzi ahlangane engabi lokudla okunengi,” kuchaza uShantel.
Uphethe ngokuxwayisa abalimi ukuthi labo bayenelisa ukuthi bazifuyele inhlanzi abakudingayo nje lulwazi ngokufuya inhlanzi.
Online Reporter