Online Reporter
Zimpapers Sports Hub
INHLOSO yeBulawayo Chiefs yikuthi ibeliqembu elikhokhelwa njengebhizimusi kumdlalo wenguqu nanko kuyacaca ukuthi lizimisele ukukufeza lokhu ngokubika kwayo ukuthi selilenkundla esemthethweni eChiefs Village koBulawayo.
Iqembu leli, elidlala kuligi yeZifa Division One kulumhlubulo welizwe, livule inkundla yalo ngempelaviki edluleyo, labika njalo ukuthi likhangelele ukuthi lisebenzise indawo le nxa seliphenduke kuligi ephakemeyo eyePSL.
Ngemva kweminyaka lidlalela enkundleni yeLuveve, iBulawayo Chiefs icabange ukuya eChiefs Village, okulinyathelo elinconywe linengi labantu abalandela inguqu kuleli, besithi kumele lokhu kubengumzekeliso kwamanye amaqembu.
Amakhosi Amahle athole inkundla yeChiefs Village Ngesizini ka-2022. Indawo le ibidume ngokuthi yiMazulu Sports Club.
Kubikwa kuthethe isikhathi eside kukhulunyiswana labaphathi benguqu ukuze kulungisiswe inkundla le ukuthi ibekusimo esivumela ukuthi isetshenziswe kumidlalo yaphezulu.
Umaqhuzu weBulawayo Chiefs uThulani “Javas” Sibanda ubike ngokujabula ukuthi sebelekhaya elitsha.
“Ngiyajabula ukulazisa ukuthi sinikezwe ngokusemthethweni imvumo yokuphatha imidlalo yethu yekhaya eChiefs Village.
“Lesi yisikhathi esihle kithi, njengoba kunikeza abalandeli bethu ithuba lokuthi babukele, basekele iqembu enkundleni yabo,” kutsho uSibanda.
Uthe ngenxa yokuthi sebelenkundla yabo, inhloso yabo izabe isekuthini baphenduke kuPSL ngesizini ezayo.
“Ukuzethemba phakathi kwethu kukhona. Sifuna ukuthi sithwale inkezo sisenkundleni le. Siyaphenduka ngokuphangisa kuPSL.
“Ngaphandle kokuthi sisebenzisa inkundla le emidlalweni, abalandeli benguqu kumele bakwazi ukuthi leli likhaya lethu elilakho konke abangakufuna okugoqela ukuzithokozisa, ukuthenga impahla zemidlalo lokunye okunengi.
“Sinxusa wonke umuntu othanda ibhola lenyawo. Lalabo abafuna ukuzochitha isikhathi bavunyelwe ukuthi basivakatshele. IBulawayo Chiefs likhaya lomuntu wonke.”
Kumizamo yayo yokulungiselela ukuphenduka kuPSL, iBulawayo Chiefs iqalise isizini le ngokuqinisa iqembu.
Idonse umgadli uKelvin Madzongwe esuka kuqembu leZebra Revolution. Iphendukise njalo uMalvin Mkolo obekuSimba Bhora lo-Arthur Musiyiwa obekuDynamos.
Abanye abadlali ngunozinti uMatripples Muleya obekuTelOne, Polite Mwenda, Gabriel Dlodlo loTatenda Ushe owahlohla amabhola angu-15 ngesizini edluleyo.
Amakhosi Amahle athethe njalo uCrispen Machisi, Brian Jaravaza loZibusiso Dambo. Iqembu lisanda kuqhatsha uBekithemba Ndlovu njengomqeqetshi omkhulu kulandela ukusuka kukaMaxwell Takaendesa Jongwe.
