admin
Thokozile Mbedzi
AMAPHOLISA esabelweni seMatabeleland North asexwayise uzulu ukuthi afake umtshiso ezifuyweni kulandela ukuzwa ngenye imuli eyanyamalalelwa zinkomo ezingu-15 ngosuku luye emadlelweni.
Isikhulumi samapholisa esabelweni lesi uInspector Glory Banda uthe abantu kababone ukuba izifuyo zabo zilophawu futhi bazeluse ukuze amasela angacini ezitshontsha.
Uthe uzulu kumele abone ukuthi inkomo kazihambi duzane lomgwaqo ngoba zilakho ukubangela ingozi emgwaqweni.
“Uzulu ukhuthazwa ukuba abone ukuba izifuyo zakhe zilomtshiso osemthethweni futhi zihlale zelusiwe.
“Abantu kababone futhi ukuthi izifuyo zabo kazihambi duzane komgwaqo loba injanji ngoba zilakho ukubangela ingozi, ukutshaywa zimota loba isitimela,” kutsho uInsp Banda.
UInsp Banda ukhulume lokhu ngemva kokwamukela kwamapholisa umbiko wokuthi kulemuli yeJambezi etshontshelwe inkomo ezingu-15 kuviki ephelileyo emadlelweni.
UInspector Banda uveze ukuthi uMichael Ndlovu oleminyaka egu-20 wavulela inkomo waziqhuba wazisa emadlelweni lapho azitshiya khona zingu-25 kodwa wathi esezibutha ntambama zasezisele zilitshumi.
Online Reporter