admin
Thokozile Mbedzi
KUDUMA amakhanda kuzakhamizi zelokitshini lePumula South koBulawayo endaweni eseduzane lezitolo zako-Ashy’s ngesehlakalo sokuqunywa komunye ujaha isitho sangasese yizigebengu ezintathu ezimbambe inkunzi.
Undoda lo, esigodle igama lakhe ngenhloso yokumvikela, oleminyaka yokuzalwa engu-21 kubikwa wahlangana lezigebengu lezi ezintathu ngoMgqibelo mhlaka 30 Mfumfu emkotweni phakathi kwamabili.
Umamangala olokhu elalisiwe esibhedlela seMpilo kubikwa wahlaselwa yizigebengu lezi ezafika zathi aziphe imali.
Kubikwa omunye wezigebengu lezi wamsondelela wambamba intamo, omunye wambamba esinye isandla andubana owesithathu akhiphe ingqamu amsike isitho sangasese watshiya silenga.
Omunye umakhelwane oxoxisane lentatheli kaMthunywa uMarvelous Zikhali uthe lokhe bemangele ukuthi kungani bemenze ulunya olungaka bamsika isitho bona sebemkhuthuzile imali yonke.
“Thina njengezakhamizi zePumula South sethukile ngesiga lesi. Undoda lo bahlangana laye ezihambela bafika bambamba omunye intamo, omunye kwelinye icele lowu owesithathu wakhupha ingqamu wamsika isitho baphinda bamthathela konke ayelakho.
“Wazama lanxa wayeselimele ngapha esopha ukuhlaba umkhosi lokutotoba eqonda ngakibo waze wathola usizo.
Isenzo sezigebenga lezi kusobala ukuthi kaziselaye unembeza,” kutsho uMnu Zikhali.
“Ukwenza kwaboguluva lokhu yikho sibili okuzenza abantu bacine bebagangela ngoba sebephambanise impilo yalundoda,” kuchaza uZikhali.
Indaba le kubikwa yabikelwa amapholisa njalo izigebenga lezo lokhu zingakabanjwa.
Isikhulumi samapholisa koBulawayo uInspector Abednico Ncube ebuzwa ngodaba lolu uvumile wathi selufikile ehofisini yabo kungakho baxwayisa uzulu ukuba bengahambi phakathi kobusuku.
“Udaba lwendoda ehlaselwe ngamadoda amathathu solufikile ehofisini yethu ngakho sixwayisa abantu ukuthi bangahambi bebodwa ngezikhathi zebusuku futhi bengabohamba ngeganga.
“Amapholisa acela uzulu ongabe elolwazi lwezigilamkhuba lezi azise amapholisa aseduzane ukuze babotshwe,” kuphetha ulnsp Ncube.
Online Reporter