admin
Cornelius Luphahla
IZAKHAMIZI zikhuthazwa ukuba zisungule amaphurojekithi okulima kanye lokufuya ngenhloso yokuvikela indlala kanye lokuzithuthukisa.
Umkhankaso wokusungula amaphurojekithi lo ukhuthazwa yinhlanganiso ekhangela ngezokulima i-Agritex ngemva kokunanzelela ukuba lonyaka indawo ezinengi zihlaselwe yindlala kungakho-ke kuqakathekile ukusungula amaphurojekithi.
UMthunywa uxhumane lomunye wabalimisi besigabeni seGwanda uNkosazana Siphephile Ndlovu wachaza ukuba amaphurojekithi aqakatheke kakhulu ebantwini.
“Njengoba lonyaka kukhanya kulendlala kuqakathekile ukuthi izakhamizi zisungule amaphurojekithi azazivikela endlaleni kungakhathalekile ukuthi ngumhlobo bani wephurojekithi. Kungaba yikufuya kumbe ukulima konke kuqakathekile,” kutsho uNkszn Ndlovu.
UNkszn Ndlovu uqhubekele phambili njalo waveza ukuthi amaphurojekithi la aqakatheke kakhulu emakhaya ngoba yikho okwande ukuphilwa ngokulima lokufuya.
“Amaphurojekithi la aqakatheke kakhulu emakhaya ngoba izakhamizi ezinengi ziphila ngokulima lokufuya kungakho-ke akukhathalekile ukuthi amaphurojekithi la yiwaphi kungaba yikufuya kumbe ukulima.
“Ekufuyeni abalimi bakhuthazwa ukuba basungule amaphurojekithi okufuya izifuyo ezincane ezigoqela izagwaca, inkukhu, imbuzi kanye lezinye izifuyo ezincane. Sikhuthaza lokhu ngenxa yokuthi kulula ukuthola ukudla kwalezizifuyo njalo kukalutshwana ukuthi noma kulendlala icine isizihlasela.
“Ezilimweni lakho kuqakathekile njalo ukuthi abalimi balime izilimo ezincane ezingadingi amanzi amanengi njalo eziphangisa ukuvuthwa. Izilimo lezi ngezigoqela imibhida, ihanyanisi, amatamatisi kanye lezinye izilimo ezincane.
“Ngakho-ke nxa abalimi sebefuna ukuthengisa izilimo zabo kanye lezifuyo kulula ukuthi bazithengisele ezinye izakhamizi kumbe baxhumane labalimisi babazise ukuthi bazithengisele ngaphi ukuze bathole imali yokuthenga ukudla,” kuphetha uNkszn Ndlovu.
Online Reporter