Online Reporter
YiNtatheli kaMthunywa
KADE abalandeli bomdlalo wenguqu abangena enkundleni zemidlalo yePremier Soccer League (PSL) bakhalela ukuthi amatikiti athengiswe ebulenjini. Sekuze kwenzakala lokhu ngokubika kukaRodwell Thabe, osaphethe isikhundla sikamaqhuzu wePSL.
UThabe kuliviki utshele iphephandaba likazulu ukuthi bazafuna ukuthi uhlelo lolu lusungulwe lasenkundleni yeBarbourfields koBulawayo, nanko benelisa ukwenza lokhu enkundleni yeNgoni esetshenziswa yiMWOS kumaviki amabili adluleyo.
Kodwa, inengi kumuli yomdlalo webhola lenyawo liyazibuza ukuthi abantu bakoBulawayo sebelungiselele na? Layo inkundla yeBarbourfields ingabe ikusimo sokuphatha loluhlelo?
UThabe uthe iPSL ihlezi ilungiselele ukuphakamisa iligi lomdlalo ukuze kuhambelane lokwenzakala kwamanye amazwe, lapho ababukeli abathenga khona amatikiti ebulenjini, endaweni yokuthi baphathe imali, benze udwendwe phandle kwenkundla mhla womdlalo.
Kubikwa iPSL iyasuthuseka ngohlelo lwe e-ticketing ngemva kokubona lusiba yimpumelelo eNgoni Stadium.
UThabe uthe inhloso yabo ngeyokuthi bafake uhlelo lolu kuzo zonke inkundla.
“Inkundla yeNgoni yaba ngeyokuqala njalo siyathaba ukwazisa ukuthi kwaba lempumela enhle. Kwathengiswa amatikiti angu-6 000, kungela bugwelegwele, ukuphuza njalo abalandeli bakwamukela,” kutsho uThabe.
KoBulawayo akwaziwa ukuthi mhla lufika loluhlelo kuzahamba njani. Loba inkundla yeBarbourfields idonsa abalandeli abanengi ukwedlula ezinye inkundla, ikakhulu kumidlalo yeHighlanders, kulokusilela kwemitshina lezakhiwo ezithile ezihambelana le e-ticketing. Kuzamele kubekwe amagagasi okuxhumana njengalokhu okusenkundleni yeNgoni.
UThabe uthe lesi yiso isikhathi sokuthi kube lokusebenzelana lokubambana phakathi kwabanikazi bezinkundla lePSL.
“Siphakathi kwengxoxo labanikazi benkundla. Nxa sifuna ukuthi lokhu kusebenze ilizwe lonke, sifuna ukuthi kuphakanyiswe isimo sezakhiwo lezi, kube lempucuko.”
