admin
Nkosilathi Sibanda
INHLANGANISO yeZimbabwe Tourism Authority ekhangele lenhlelo zokuvakatsha elizweni isiyethule umbiko itshayela ihlombe abadlali beqembu lama-Chevrons kulandela ukunqoba kwalo isizwe se-Pakistan.
I-ZTA ibika ukuthi ukunqoba lokhu kukhukhumeze lomkhankaso wayo wokukhuthaza umhlaba ukuvakatshela indawo zakuleli. Iqembu lama-Chevrons le-ZTA zavumelana ukuthi sihambe phambili kulolohlelo.
Iqembu lekhilikithi leli seligqoka izikipa ezibhalwe “Visit Zimbabwe” ngenjongo yokuthi lisekele uhlelo lolu olwasungulwa nguMongameli wesizwe uEmmerson Mnangagwa ngenyanga edluleyo.
Isikhulumi seZTA uGodfrey Koti ubike ukuthi ukunqoba kwama-Chevrons phezulu kwesizwe se-Pakistan kuyisibonelo sokuthi iqembu leli libalulekile ekuthengiseni indawo ezingavakatshelwa yizethekeli.
“Umkhankaso wethu wokusebenzisa ezemidlalo, ikakhulu ikhilikithi luyaqhubeka. Sithi halala kubafana bethu bamaChevrons ngokuphakamisa ifulegi yethu.
“Kulandela ukuvumelana ukuthi iqembu ligqoke izikipa zalo ezilotshwe “Visit Zimbabwe” kube kuhle ukuthi amaChevrons anqobe ngesikhathi sikhankasela imvuselelo yokuvakatshela isizwe,” kutsho uKoti.
Ukaputeni weqembu uRandom Taylor uhle wabika ukuba ukudlala abakwenzileyo kube yinkuthazo yokuthi umdlalo wekhilikithi usakhona kuleli.
“Kuhle esikwenzileyo, kube ngumdlalo osivuse idlabuzane,” kutsho ukaputeni lo esebulenjini ngoLwesithathu.
Ukudibana le-Pakistan bekungo kwakuqala lokhe kwavalwa imidlalo ngenxa yeCoronavirus.
Kusenjalo abalandeli bomdlalo wekhilikithi bathe ukunqoba kwama-Chevrons kuzamele kube yinto yansukuzonke.
Ukuqoqwa kweqembu ngesiphangi phangi kwenze abanye abasola indlela okukhethwe ngayo abadlali bayangeka.
Online Reporter