admin
Thokozile Mbedzi
KULOMFANA oleminyaka engu-12 weSun Yet Sen ofe ngemva kokubhewuka egade inqola labangane bakhe ababili ngeSonto edluleyo.
Umuyi uNqobizitha Ndlovu oleminyaka engu-13 kubikwa wayegade inqola labangane bakhe ababili abaleminyaka engu-12 aze ehlelwe ngamashwa la.
UMthunywa uzwe ukuthi inqola yatshaya isitompu yasibhewuka yambokotha okwabangela ukuthi uNqobizitha ayetshaya phansi ngekhanda wahle wafela lapho.
Omunye walabo abafike kumonakalo lo uMnumzana Thabani Moyo uveze ukuthi ingozi le ibebuhlungu ngoba akuzange kutholakale noma lona ithuba lokuthi uNqobizitha agijinyiselwe esibhedlela.
“Okubangele ingozi le yikuthi inqola isuke yatshaya isitompi yahle yabhewuka. Abantwana ngabantu abathanda ukuncintisana ngaso sonke isikhathi ngakho kube buhlungu ukuthi kusuke kwaba leyezi elimnyama kodwa abantwana yibo abasincedisa imisebenzi ngaso sonke isikhathi.
“Okwenzakale lapha kubuhlungu ngoba wonke umzali ukhangelele ukuba abantwana laba yibo ikusasa lethu pho nxa sebesitshiya njalo bebancane sizasizwa ngobani kusasa njengoba sesikhulile. Silapha sonke sidanile ngoba kusehlele singakhangelelanga ukuba umntwana omncane kangaka angadlula emhlabeni ngalindlela,” kulandisa uMnu Moyo.
Uqhubekele phambili esithi abanye bakhe babe lentelezi basinda bengalimalanga.
“Sonke sibonge khona ukuthi abanye basinde ekufeni bengelangitsho lenxeba ngoba besizakuthini ingozi engaka,” kulandisa Moyo.
Isikhulumi samapholisa esabelweni seMatabeleland South uChief Inspector Philisani Ndebele ebuzwa ngodaba lolu uvumile wathi solufikile ehofisini yakhe waxwayisa uzulu ukuthi ananzelele abantwana sonke isikhathi.
“Udaba lomfana obhewuke ngenqola wafa solufikile ewofosini yethu ngakho uzulu ngaso sonke isikhathi kumele akwazi ukuthi abantwana bangaphi njalo baphephile ukuze bangehlelwa yingozi efana lale,” kuphetha uChief Insp Ndebele.
Online Reporter