admin
Mehleli Dube
KULOMGULUKUDU wesela, elalibizwa ngokuthi nguMthizozo, ngitsho laseNingizimu Africa babemazi. Lapho adlule khona kwakujuluka umsisila endodeni, ukuchitha igazi wayengakuthathi mango, ikakhulu nxa uphikisana lalokho ayabethe ukwenze, wayedlwengula sibi sengane esaphoqoza.
Empeleni wayeswela nje uboya, kwakumele aphile ehlathini lezinyamazana zasendle.
Wayethi angadala icala abaleke ayecatsha eGoli, lakhona ngale angabona ukuthi abomthetho sebezamgola abaleke aze ngapha, kwesinye isikhathi abhekise amabombo kweleBotswana ayepholisa amaseko.
Wawungacabanga ukuthi uyisemkhulu wayemcabele ngentebe yegazi lomvundla, phela wayenguphunyuka bemphethe.
Wayethi nxa ephumelele kubugebengu bakhe, uzwe nxa esephuza ugologo ezibiza ngokuthi yena ulidelakufa, njalo lovalo akasela walukhupha walujikijela le lwadliwa ngamanqe.
Lonina wayesekhathele ngaye aze aphumisele athi lo ngabe waya empini wayafela khonale.
Umbhobho wayewazi, lokuthi wayewufundele ngaphi njalo efundiswe ngubani, kwakusazi yena, ngabe wayehambile empini kaZibuse sasizakuthi mhlawumbe uwufundele khonale, ngoba siyake sizwe othebula beqamba kuboMgagawo lakuboMwembeshi lapho abafundela khona inkafulakufa.
Njengoba isintu sisithi akuqili lazikhotha emhlane njalo kwelinye ilanga indwangu iyalukhutha ugatsha ilaxazeke phansi, wathi eqhubeka ngobudlova bakhe eseGoli, bahle batshaya ikhanda waphangalala eveze amazinyo okwechalaha elifele esidakeni.
Sabuya isidumbu mhla engcwatshwayo umfundisi wathi uMthizozo wayengumuntu olungileyo, wayengela sici lomuntu mhlawumbe ekuthathela ekuthini ofileyo kasezwa, kodwa kwakubalulekile ukuthi afakaze ngemisebenzi yakhe emibi, labantu ababebuyile emngcwabeni babefuna ukuzobona ukuthi ngempela awusekho lomgulukudu emhlabeni, umdala wami uDlomo waze wathi kumfundisi, “ngikubambe umlomo, lumuntu othi wayelungile wabulala indodana yakhe yatshiya ingane, lomakoti esesemutsha.”
Ayixabene.
0714355641
Online Reporter