admin
Zintatheli zikaMthunywa
KUDABA olutshiye abantu beSamlodi, eGwanda bebulawa zinsini, kulosobhuku onikele imbuzi zesinye isakhamuzi ngezinja okubangele ukuthi enye ife andubana athi uzayibhadala ngeyakhe eyincukubili.
UBilly Msimanga (90), ongumkhokheli wesiqinti seMabhoyi wetheswa icala lokulumisa imbuzi zikaThabiso Nyathi (60), ngezinja emavikini amabili edluleyo.
Kuzwakale ukuthi uMsimanga wanikela imbuzi zikaNyathi ngezinja ngesikhathi zifohlele egumeni lakhe.
Izinja zikaMsimanga kubikwa zahlasela zabulala imbuzi eyodwa okwabangela ukuthi uNyathi ayemangalela kumlisa.
UMsimanga kazange alale icala lakhe inkundla yamgweba ukuthi ahlawule leyo mbuzi eyafayo ngenye.
Isimanga yikuthi ngemva kokuvuma icala lakhe uMsimanga wathi uzahlawula imbuzi kaNyathi ngeyakhe eyincukubili okwenza izakhamizi zamangala zithi lanxa engumkhokheli uyadelela.
UMthunywa wenelise ukukhuluma lo Mnu Nyathi yena othe kalankani ngesenzo sikasobhuku.
“Kuliqiniso ukuthi izinja zikasobhuku uMsimanga zabulala imbuzi yami kodwa osekungiqeda amandla yikuthi uthi uzangihlawula ngencukubili.
“Angiyifuni imbuzi yakhe le, eyincukubili kadinge enye,” kutsho uNyathi.
Uqhubekele phambili eveza ukuthi yena uyamhlonipha usobhuku njengomkhokheli wesigaba kodwa nxa engaqhubekela phambili ngemihlola yakhe le uzayakwazisa induna.
UMthunywa uxhumane loMsimanga yena oveze ukuthi uyalazi icala lakhe kodwa kazange athi ufuna ukubhadala ngembuzi eyincukubili.
Uveze ukuthi yena kalambuzi okwakhathesi kodwa uzayidinga.
“Icala lami ngiyalazi njalo ngiyalivuma lokhu osekukhulunywa ngabantu kungamanga ngoba mina vele angilambuzi. Ngizayidinga ngibhadale,” kuphetha uMsimanga.
Icala leli lizathoniswa enkundleni yenduna ngoLwesithathu kuviki ezayo.
Online Reporter