Online Reporter
Sikhumbuzo Moyo
IZAKHAMIZI zesiqintini seNkandembwe kuWadi 10, eHwange, zisengozini yokutheleleka ngemikhuhlane nanko zinatha mthombo munye lezifuyo zazo.
Abantu bakulindawo bathembe umthombo lo ukuze bathole amanzi okunatha, ukupheka lokwenza eminye imisebenzi. Izifuyo kanye lenyamazana zeganga lazo zinatha kumthombo ofanayo.
Ukhansila kaWadi 10 uLethu Simangani uthe kulemizamo yokulungisa uhlupho lwamanzi kodwa babiselwa emuva yisimo esibi semigwaqo, okwenza ukuthi umtshina wokugebha isibholane ungafiki ngesikhathi.
“Kwazanywa ukuthunyelwa umtshina wokugebha isibholane ukuze abantu bathole amanzi, kodwa wehluleka ukufika eNkandembwe ngenxa yokuthi akula mgwaqo omuhle oya kulindawo,” kutsho ukhansila uSimangani.
Uthe ukuswelakala kwamanzi ahlanzekileyo kubeka izakhamizi engozini yokungenwa yimikhuhlane.
Ubuye wacela ukuthi kuthathwe amanyathelo aphuthumayo ukulungisa uhlupho lwamanzi kanye lemigwaqo.
“Ukutholakala kwamanzi kuqakathekile empilweni yabantu, ngakho sidinga ukuncediswa masinyane ukuze kutholakale indlela ezaqeda udubo lolu,” kutsho uSimangani.
Uhlupho lweNkandembwe luphinde lwaveza ubunzima obubhekane lezakhamizi ezihlala endaweni ezikhatshana ledolobho leHwange. Izakhamizi zithe ukulungiswa komgwaqo kuzakwenza kube lula ukuthi imitshina yokudonsa amanzi ifike kulindawo.
Blessing Chizhande