Online Reporter
Nkosilathi Sibanda eseBarbourfields
IZIZALWANE zakuleli ziphume emakhaya azo zaqonda enkundleni yeBarbourfields ngoLwesine, zilande ukuyagubha umkhosi wamasiko.
Kudibene abantu abavela kuzabelo zonke zelizwe.
Kusukela ekuseni kuvulwa amagedi enkundla, kuhle kwaqala injabulo lokuthoza. Lalabo abahlala duzane lenkundla babonile ubukhulu balumbuthano okukhangelelwe ukuthi uvulwe nguMongameli Emmerson Mnangagwa emini.
Okudonsa amehlo kulumkhosi yibukhazikhazi bemvunulo yesiNtu kunye lokunxuswa kwabantwana besikolo ukuze bezobona mathupha ukuphakanyiswa kwamasiko okwenziwa nguHulumende, ngesikhathi kuqiniswa iHeritage Based Education.
Inkundla igcwele umsindo womculo ovela kubahlabeli abatshiyeneyo, ukutshaywa kwengungu, impempe lokugida kwamaqembu amasiko, aveza amasiko eZimbabwe ehlukeneyo.
Abathengisa ukudla kwesiNtu, imisebenzi yezandla lezembatho zesintu labo bagcwele ngaphandle kwenkundla lapho abantu athatha khona amathuba okuthengisa lokubona okwehlukeneyo okumayelana lamasiko.
Ingcitshi kwezokuqhutshwa kwembuthano kazulu egxile kwezamasiko lomculo, uSaimon Mambazo Phiri uthe umoya okhona eBarbourfields utshengisa ukuthi abantu beZimbabwe basalithanda isiko labo.
“Lamuhla sibona abantu bemanyene ngenxa yamasiko. Kuyasithokozisa ukubona uHulumende esekela amasiko ngoba yiwo asenza sibe ngabantu beZimbabwe,” kutsho uPhiri.
Umqondisi wenhlanganiso yeSunduza Arts and Culture uCharles Mahlaba Ncube uncome uHulumende ngokunika abaculi labasebenza kwezobuciko ithuba lokutshengisa amathalenta abo.
“Isimo esikhona lapha siyamangalisa. Inkundla igcwele abantu abathakazelela amasiko abo. Lokhu kutshengisa ukuthi uBulawayo ulokhe iyindawo yamasiko lezobuciko,” kutsho uNcube.
UDesmon Ntini, oyingcitshi kwezamasiko lokulandelwa kwawo uthe umkhosi lo ukhuthaza abasakhulayo ukuthi bazigqaje ngamasiko.
“Abantwana labatsha abanengi balamathalenta kwezokulingisa, ukusina lokuhlabelela bazathola okunengi lapha. Imikhosi enjengale ibapha amandla lokuzethemba,” kutsho uNtini.
Umbhali wemidlalo ongumlobi odumileyo uRaisedon Baya uthe ukubona abantu abanengi kangaka bebuthene kutshengisa ukuthi uzulu uyaliqakathekisa isiko.
“Umoya okhona lapha uyamangalisa. Sibona abadala, abantwana lentsha bethokoza ndawonye. Yikho kanye okutsho isiko,” kutsho uBaya.
Abafundi bezikolo ezitshiyeneyo labo benze abantu bathokoza ngemigido yesintu, inkondlo lemidlalo egcine inkundla yonke ilomsindo wenjabulo.
Omunye umfundi weMkhithika Thebe Primary eseCowdray Park uthe:
“Siyajabula ukutshengisa amasiko ethu phambi kukaMongameli lenkulungwane zabantu. Kusenza sizigqaje ngokuba ngamaZimbabwe,” kutsho umfundi lo.
