admin
YiNtatheli kaMthunywa
UMQEQETSHI wabafana bezimbamgodi iHow Mine uKelvin Kaindu usebike ukuba iqembu lakhe lifuna inkundla engcono kuleWhite City mhla lihlangana lentshantshu zeligi yeCastle, iChicken Inn kumdlalo wesithathu kulimpelaviki.
Ekhuluma loMthunywa ngoLwesibili, uKaindu ubike ukuba inkundla yeWhite City ayivumi ukuba abafana bakhe badlale umdlalo abawujwayeleyo ngoba inkundla le incane.
“Sifuna ukuwuqhoba umlenze wenkukhu le kodwa kumele sithole inkundla evulekileyo ukuze siqedelane lazo lezi intshantshu,” kuveza uKaindu.
IHow Mine ingena kumdlalo weligi ingakaze ikhume phansi kulandela ukuba ngutshiki lobhanqa labafana abatsha, iBulawayo Chiefs nge 2-2 emdlaweni wakuqala kukanti kowesibili yabhuqa iZPC Kariba nge 2-0 enkundleni yeWhite City. Lokhu kutsho ukuthi iqembu leHow Mine alikaze linyathele kwezinye inkundla kule isizini. Ukutshintsha inkundla sokungenza balahlekelwe yinhlanhla.
“Umdlalo wethu leZPC Kariba usipha umdlandla kulandela ukuthi liqembu ebelingikhathaza kakhulu noma ngingakabuyi kuHow Mine,” kubika uKaindu.
UKaindu ubike ukuba abafana bakhe benza kuhle lekulolongeni ikakhulu uPasca Manhanga loTsepo Ranthokoane bona abathulisa abafana beZPC ngokuhlohla emdlalweni lo.
“Ngisaselomlandu omkhulu ikakhulu kubagadli bona engifisa ukuthi ngabe bafana lembabazane kungakho sizakukhangela ekulolongeni kwethu,” kubika uKaindu.
Umqeqetshi lo ukhuthaze njalo inhlanganiso yePremier Soccer League ukuba ibone ukuthi abadlali bagqoke imvunulo ezilenombolo ngoba kusenza kubenzima kubaqeqetshi ukunanzelela abadlali abakhathaza amathimu abo nanko phela iZPC Kariba ibingela nombolo emabhulugweni.
IHow Mine ingene kumdlalo lo ingela Charles Sibanda kodwa bekungakhanyi kulandela ukuthi iqembu belidlala njengenjayelo.
“KuHow Mine akulamdlali okuthiwa kaqakathekanga. Yebo ubengekho uCharlie ngenxa yomonakalo kodwa bekungelasikhexe sakhe. Ngokunjalo umdlalo lo siwudlulisela kuye,” kuveza uKaindu.
Umqeqetshi lo ubike ukuba uCharlie uzabe ekhona kodwa kuzamele alwele ijesi lakhe ngoba abafana benza kuhle ngesikhathi engekho.
Kusenjalo iphephandaba likazulu likubika ngokugcweleyo ukuthi iPremier Soccer League ayisuthiseki ngesimo senkundla yeWhite City kulandela ukuthi ikhansili ayifakanga ama-stabs. Lokhu kutsho ukuthi nxa ikhansili ingasakubambanga kuhle amaqembu wonke asengayakuthi cwi Emagumeni wonke.
Imidlalo yeCastle PSL kulimpelaviki:
NgoMgqibelo: Chicken Inn v How Mine (Luveve), ZPC Kariba v Bulawayo City (Nyamhunga), FC Platinum v Chapungu (Mandava).
NgeSonto: Tsholotsho v Highlanders (Barbourfields), Hwange v Ngezi Platinum (Colliery), Caps United v Harare City (National Sports Stadium), Triangle v Border Strikers (Gibbo), Dynamos v Mutare City Rovers (Sakubva).
Online Reporter