admin
Ncekwenhle Ncube
INHLANGANISO yeNational Blood Service (NBSZ) ikhuthaza uzulu wonke ukuthi aphatheke ekupheni igazi kusukela kuyonale inyanga kuze kuyefika ikhefu emadolobheni atshiyeneyo lasemakhaya endaweni ezitshiyeneyo ezibekiweyo.
Ababona ngezokupha igazi bachaze ukuthi ngezikhathi zekhefu izinga lokuchitheka kwegazi liyaqansa. Lokhu kungenxa yezingozi ezenzakala emigwaqweni kanye lokungaziphathi kuhle kwabantu ikakhulu abantu abatsha.
UMnumzana Sifundo Ngwenya ubikele intatheli ukuthi ngesikhathi sekhefu abantu bonke kumele bazinikeze umlandu wokupha igazi ngoba ingozi zinengi kungakho-ke banengi abantu abayabe bedinga igazi.
“Njengenhlanganiso sithanda ukukhuthaza wonke umuntu ukuthi ayekupha igazi. Ngesikhathi sekhefu kuba lengozi ezinengi ngakho isiphala sethu kumele sihlale silalo igazi lokunceda labo abayabe bezithole besengozini.
“Sesibeke indawo ezehlukeneyo emadolobheni atshiyeneyo lapho abantu abazakupha khona igazi. Sikhuthaza ontanga ikakhulu ukuthi baphe igazi lelo ngoba lizasiza abantu abanengi abalidingayo,” kutsho uMnu Ngwenya.
Kubikwa koBulawayo kuzabe kulomkhosi wokukhankasela ukupha igazi mhlaka 9 kusiya ku10 Mpalakazi esikolo seEveline High School kuthi mhlaka 12 ngenyanga efanayo bazabe beseSigodini ngohlelo olufanayo.
Uhlelo lolu luzaqhutshwa njalo endaweni ezifana leTsholotsho, Gwanda lePlumtree.
Inhlanganiso yeNBSZ ikhuthaza kakhulu abatshayeli bezimota ukuthi baphatheke enhlelweni ezifana lalezi ngoba kuyibo abasengozini zokulimala.
UMnu Ngwenya uxwayise uMthwakazi ukuthi aziphathe kuhle ngezikhathi zentokozo ngoba yikho lapho abanengi abalimala khona. Uxwaye kakhulu abatshayeli ukuthi bananzelele nxa beqobotsha bengabi ngamatshapha emigwaqweni ngokutshayela bedakiwe.
Uqhubekele phambili esithi abantu abatsha baxwaye ukuya emacansini ngezikhathi zekhefu ngoba yikho lapho ababamba khona imikhuhlane engabenqabela ukuthi baphe igazi.
Inkokheli zomdabu, abafundisi labo bayacelwa ukuthi bakhuthaze abalandeli babo ukuthi bahlanganyele labanye ngezikhathi ezinye ezifuna ukusebenzela ndawonye.
I-NBSZ izasebenza kanye lamanye amankampani ikakhulu ayenza imisebenzi enzima elakho ukulimaza abantu ukuthi izisebenzi ziphatheke kuhlelo lokupha igazi.
Online Reporter