admin
YiNtatheli kaMthunywa
AMANTOMBAZANA adlala i-hockey kuleli alobungcitshi baphezulu kulumdlalo nanko isizwe sesiphumelele ukuncintisa kunkezo yomhlaba.
Ukuphumelela kwamantombazana lokhu sekubatshazwe yinhlanganiso ye-hockey kuleli ebike ukuba sekusele ukuthi iZimbabwe iyencintisa njalo kumbuthano wamaOlympics.
Umaqhuzu wenhlanganiso yeHockey Association of Zimbabwe (HAZ), uHumphrey Chigwedere ubikele uMthunywa ukuthi sebezadonsa ngazo zonke izandla ukuthi bancedise ithimu yamantombazana iqhubeke inqoba kumincintiswano yaphezulu.
“Ukudlala kwamantombazana ethu kuyisitshengiselo sokuthi isizwe siyaphambili ngomdlalo we-hockey.
Kuyajabulisa njalo kuyakhuthaza amanye amathimu esizwe ukuthi enze okufanayo.”
Kusenjalo uChigwedere uthumele iphephandaba likazulu umbiko wokuthi inhlanganiso yeHAZ izaqoqa imincintiswano eminengi ezadlalelwa enkundleni yeKhumalo koBulawayo kulumnyaka.
Uthe imincintiswano le izadibanisa amathimu asacathula kanye lalawo ayaziwayo kuleli laphuma kwamanye amazwe.
“Ikhona imincintiswano ezabuya koBulawayo. Sincoma indlela inkundla yeKhumalo egcinwe ngayo ngakho kungumlandu wethu ukuthi siphakamise imidlalo yonke kulindawo.
“Okwamanje sizama ukuthi senze umdlalo we-hockey lawo ubesezingeni eliphakemeyo njengeminye imidlalo.
Kudala ilizwe lakithi belisazakala ngomdlalo we-hockey. Ngenxa yokuwa komkhonomi, inkundla zeHockey lazo zacina zisifa ngakho lelizwe lakithi kalisenelisi ukubonakala njengamanye amazwe,” kutsho uChigwedere.
“Ukuqoqa imincintiswano eminengi kukundla esilazo kunceda kakhulu amathimu akuleli ngoba abadlali bayabona ubungcitshi babanye abadlali. Phezulu kwalokhu, inkundla zethu ezibalisa iBulawayo Hockey Stadium leMagamba eyeHarare zizasetshenziswa kanenginengi, okuyikho okumele kwenzakale.”
Online Reporter