admin
Cornelius Luphahla
KUZABE kuyithapha utshiye esabelweni seMatabeleland South lapho okuzabe kudibene khona amaqembu atshiyeneyo kamaskandi azatheleka endaweni ezitshiyeneyo ukuze baphakulele uzulu ukudla kwamehlo kweKhisimusi.
Amaqembu azathokozisa uzulu endaweni ezigoqela eKezi eSt Joseph, eMaphisa Metro, Plumtree, Tshelanyemba, Sun Yet Sen kusukela mhlaka 24 kusiya kumhlaka 2 kunyanga ezayo.
Kukhangelelwe ukuthi amaqembu athi iZinjaziyamluma, Amabhukudwane, Nsukamini, Amachwane amahle kanye lamanye atshiyeneyo abe ededelana inkundla ngalezonsuku.
UMqondisi weqembu Amabhukudwane uJunior Ngwenya ubikele iphephandaba likazulu ukuba lonyaka bafuna ukutshengisa uzulu ukudla kwamehlo.
“Ngekhefu leKhisimusi sifuna ukutshengisa uzulu ukudla kwamehlo njengoba phela amaqembu kamaskandi azabe edibene endaweni ezitshiyeneyo.
“Lokhu sikwenza ngenjongo yokujabulisa umphakathi lokuwukhumbuza ngesiko likaMthwakazi. Ekuvakatsheni lokhu sizabe siliqembu laMabhukudwane leNsukamini noma nje kuzabe kulamanye amaqembu kamaskandi,” kutsho uJunior Ngwenya.
Ekhuluma lentatheli uCristopher Ncube ongumkhokheli weqembu leNsukamini uchaze ukuthi njengeqembu likamaskandi bajonge ukuhlanyela umculo kamaskandi kuleli.
“Thina njengeNsukamini sijonge ukuhlanyela umaskandi kuleli ngoba singafika kuzabhinqilika ngitsho lesalukazi.
Njengoba abadala babethi zindala zombili, yikho-ke okuzenzakala, kakho ozathanda ukuncintwa. Yeka ngowathi ukutshelwa yikuncitshwa,” kuphetha uCristopher Ncube.
Online Reporter