Online Reporter
Lovemore Dube
UMBUZO osegudwini yikuthi kungaba labanye na abangenelisa izikhathi zokuthi babekuqembu leZimbabwe elizancintisa kumaWorld Athletics Championships.
Imidlalo le izaba seTokyo eJapan ngoMpandula.
IZimbabwe okwakhathesi iloTapiwanashe Makarawu, Makanakaishe Charamba, Vimbai Maisvoreva, Tendai Zimuto loIsaac Mpofu.
Laba bobathathu benelise ukugijima izikhathi ezingaphansi kwalokhu okwethwa yiWorld Athletics abathi ngama-Qualifying Standards.
Abagijimayo baphiwe usuku luka 27 Ncwabakazi ukuze bagijime, bayeqe kumbe bajike.
Kulabanye njalo abazavunyelwa ukuyagijima bemenywe yinhlanganiso yezokugijima kuthathelwa kuzikhathi zabo njalo lokuthi bami njani kulabo abagijime lonyaka lokuthi benza njani kuma-Olympics.
Lapho okukhangelelwe izikhathi nxa bengenelanga abagijimayo nxa kuthiwe kufunakala 48, abanye bavela kuma-Olympics, World Relays labadojwa okwenhlanhla yamaswazi.
UMakarawu yena olesikhathi se-19.84 seconds esingese sithupha kwabagijima kuzinga eliphezulu ku200m, loCharamba laye ole-19.92 kubanga elifanayo, benelisa ukugijima izikhathi ezikhangelelweyo.
Ku400m yabomama, uVimbai Maisvoreva laye wenelisile ukugijima okukhangelelweyo. Kugijinywe kuhle angafika kuma-semi-final kukanti uCharamba loMakarawu ebenza kuhle babayingxenye yalabo abafika ku-Olympic final, bangethusa, kumhlaba babephakathi kwabakhokheleyo ku200m eJapan.
Sebephumule njengoba imidlalo yekholitshi isimile sebengabantu asebesebenza bengelamithwalo esindayo.
UMpofu loZimuto bazagijima i-marathon ye42.2km lapho abazahlangana lezigebenga zendlela ezivela kubo Ethiopia, Uganda, Rwanda, Burundi, Algeria, Poland, Britain, America leKenya.
Kwabeqayo kungenzeka uChengetai Mapaya enelise ukubakhona ngoba weqe17.15m okulibanga letshumi lasitshiyangalombili (12) emhlabeni lonyaka. Khona kukhangelelwe ukuthi ngabe weqa i-15.22m kodwa nje nxa bengasafikanga ku32 abangcono kulaye, angazibona laye esemidlalweni le.
Kulababili abagijimayo uDenzel Siamusialela loDavid Nyamupfira labo abaseduzane ku200m le100m
Ngokulandelana kwabo.
USiamusialela wagijima i200m nge20.20 seconds khona kukhangelelwe i20.16 angabalethuba ngoba phezulu kulamajaha eJamaica leAmelika abanengi, okungapha abanjengaye ithuba. Izwe ngalinye livunyelwa abagijimayo abathathu kumudlalo munye.
Nxa kungabalomncintiswano ophilayo bangenza izimanga u27 Ncwabakazi engakafiki benelise ukuba kuqembu lesizwe.
IZimbabwe isingelinye lamazwe abukwayo ekugijimeni amabanga amafitshane ngemva kukaCharamba loMakarawu ukunqoba abakwenzayo ku-indoor 200m lapho izikhathi zabo u20.13 seconds zigqibe umnyaka bephezu komdlalo.
