admin
Cornelius Luphahla
INHLANGANISO ezikhangela ngezamasiko sezisungule umkhosi wokuthuthukisa ezamasiko kanye lendimi zesintu.
Umkhosi lo kubikwa uqhutshelwa eNational Gallery koBulawayo lapha okuhlangana khona intshantshu zokugida kusukela kuviki ephelileyo kuze kuyofika uLwezi.
Inhlanganiso lezi ezenza umkhosi lo zigoqela i-Alliance Francaise, Gitiz Arts Organisation, National Gallery Bulawayo, Umkhathi Theatre kanye le-Multi Media Box ababalisi kanye labantwana besikolo ngenhloso yokuvuselela amasiko. Ngakho-ke umkhosi lo kubikwa uzaqhutshwa uyizigaba ezintathu, esakuqala siqale kuyonale inyanga sizaphela ngoLwezi lonyaka kuthi esesibili lesesithathu sizaqhutshwa enyangeni ezifanayo eminyakeni emibili ezayo.
Kubikwa umkhosi lo uzabe uqhutshwa maviki wonke ngoLwesihlanu kusukisela ngo 2 emini kusiyakuma ngo 5 ntambama ngaphandle koLwesihlanu lokuphela kwenyanga. Ngakho-ke umgido munye ngamunye uzaqhutshwa okwamaviki amabili njalo igidwa ikakhulu ngabantwana bezikolo ezitshiyeneyo.
Ekhuluma ekuvulweni komkhosi weDance Remedial Zimbabwe ngoLwesihlanu kuviki ephelileyo uNkosikazi ……… Nyathi uchaze ukuthi kuqakathekile ukuba sifundise abantwana ngezamasiko siwalondoloze.
“Sinanzelela ukuthi inengi labantwabethu kalisawazi amasiko kanye lendimi, seliqakathekisa isiKhiwa kuphela.
Lokhu kuveza ukutshabalala kobuzwe bethu yikho nje sibona kungcono ukuba sibuvuselele ngomkhosi lo.
Njengoba nje inengi labantu kuleli abasakuthakazeleli ukubala ngembali yesizwe sethu yikho-ke sithe kungcono sibabukelise imigido le ukuze bathole imbali eqondileyo yesizwe,” kutsho uNkkz Nyathi.
UNkkz Nyathi uqhubekele phambili njalo waveza ukuthi emkhosini lo abantu bayabe befunda ngcono amasiko ngoba bebona abantwana begida njalo umkhosi lo kawukhethi mhlobo.
“Njengoba nje kuzwisiseka ngcono nxa umuntu ezibonela ngamehlo njalo akulula ukuhamba sifundisa ngezamasiko endaweni ezitshiyeneyo yikho sisungule umkhosi lo ukuze abantu bazifundele lula. Lokhu kungenxa yokuthi umuntu uyabe ezibonela ngamehlo konke okwenziwayo ngakho kubalula ukuthi akubambe.
“Emkhosini lo kuyabe kugidwa imigido etshiyeneyo kungakhathalekile ukuthi ngeyawuphi umhlobo wabantu.
Lapha senzela ukuthuthukisa yonke imigido kanye lamasiko abantu bonke bakuleli. Kule inyanga kuzabe kugidwa umgido othiwa nguMuchongoyo okuyiwo ozaqala mhla ka 4 Mbimbitho,” kuveza uNkkz Nyathi.
Kubikwa kumnyaka ophelileyo umkhosi wokuqhutshwa kwezamasiko lezi ubukhangele ukuqhutshwa kokugxiva lokukikimba okuvela esikweni lamaXhosa. Ngalokhu lonyaka ukuqhutshwa kwamasiko lokhu kuzaqhutshwa ngokugida langokwenziwa kwenkondlo.
Online Reporter