admin
Johas Moyo
INHLANGANISO yeLivestock Production Department esabelweni seMatabeleland South ikhuthaza abalimi ukuthi bathengise inkomo zabo zisekusimo esingcono baphinde baqalise ukufuya imbuzi ngoba azingadingi kudla okunengi.
U-Aram Urayayi onguLivestock Production Officer eMatabeleland South ukhuthaza abalimi ikakhulu abeGwanda District ukuthi baphungule inani lenkomo zabo baqalise ukufuya imbuzi ngoba zisenza ngcono kulenkomo.
“Sikhuthaza abalimi ukuthi bananzelele isikhathi esiya kiso okuyisikhathi sendlala ngokunjalo amadlelo kasekho njengoba lonyaka kutshile kungakho sibakhuthaza ukuthi bathengise inkomo baqalise ukufuya imbuzi ngoba azidingi kudla okunengi njengenkomo,” kutsho uMnu Urayayi.
Uqhubekele phambili efundisa abalimi ngokuqakatheka kokufuya imbuzi kulokuthi bafuye inkomo.
“Kuqakathekile ukuthi abalimi bananzelele ukuthi kuRegion 5 okuyindawo engelazulu kudinga ukuthi abalimi bafuye izifuyo ezimelana lomumo wendawo yabo ezifana lembuzi njengoba zisidla amahlamvu ezihlahla kakhulu njalo eGwanda yindawo yezihlahla zameva ezilungele ukuba yikudla kwembuzi yikho nje sisithi abalimi bafuye zona,” kutsho uMnu Urayayi.
Uthe ukufuya imbuzi kungcono kakhulu ngoba ziyazala ngokuphangisa kulenkomo njalo umlimi uba lenzuzo enengi ngesikhathi esincane nxa ethe wenelisa ukuzifuya kuhle.
“Okokucina ngithanda ukuthi ngikhuthaze abalimi ukuthi bathathe ukufuya imbuzi njengebhizimusi elizabapha imali ngokuphangisa ngoba imbuzi zizala kabili ngomnyaka njalo kazidingi manzi lokudla okunengi.
“Umlimi okufanele akwenze nje kuphela yikuthi azilungisele kuhle isibaya zazo ukuze zingathelelani imikhuhlane efana lesikhwekhwe lezilonda ngoba akumelanga zibe sendaweni elamadaka njalo engena izulu,” kuphetha uMnu Urayayi.
Online Reporter