adminYiNtatheli kaMthunywa
KUKHANYA sekusibanzima ukuqhuba imidlalo lenhlelo ze-basketball esabelweni sakoBulawayo laseMatabeleland North njengoba sekuswelakala imincintiswano losekelo lwemali kulumnyaka.
UJonathan Phangwana, unobhala weBulawayo Basketball Association uthe balokhe belodubo lokuthola imali yokuncedisa ukuthi imidlalo yabo iphumelele.
Inhlanganiso le isikhethe ukuthi ibumbe amakhomithi azanikezwa umlandu wokuthi abhode emankampanini lakulabo abangasiza ukuthi bancedise lumdlalo.
“Sekuzakuba lekhomithi ekhethwe phakathi kwamaqembu esilawo. Ikhomithi le ngeyokuncedisa ukuhlanganisa imali lokunye okufuneka nxa siqoqa imincintiswano engekho kukhalenda yethu yeligi. Njengoba isizini isivuliwe, kuqakathekile ukuthi amathimu ethu engadlaleli inkezo yeligi kuphela kodwa alolongele ukuthola imincintiswano ethile phakathi komnyaka,” kutsho uPhangwana.
Ukubunjwa kwekhomithi kubonakala njengenyathelo elizenza kubelula ukuthi umdlalo we-basketball kuleli uthole usizo ngokuphangisa. Kukhangelelwe njalo ukuthi nxa sekulekhomithi le, ukusetshenziswa kwemali kulumdlalo kuzabekwa egcekeni.
“Sesinanzelele ukuthi kulamabhizimusi angafuni ukusebenza lamalunga ekhomithi enkulu ngoba besesaba ukuthi imali yabo ingatshabalala. Nxa sesilabantu ababona ngokudinga imali, abangekho kukhomithi yethu, kuzaletha ukwethembana phakathi komdlalo lamabhizimusi.”
Kusenjalo, inhlanganiso yeBasketball Union of Zimbabwe iyaphambili ngokusungula umncintiswano omutsha ohlanganisa amathimu akumaligi akumhlubulo ongezansi yelizwe.
UJoe Mujuru isikhulu seBUZ ubike ukuba amathimu azadlala phakathi komnyaka loba babehlele ukuthi kuzancintiswanwa ngenyanga kaMabasa.
Ngomnyaka odluleyo, uMujuru watshela uMthunywa ukuthi ukuhlanganiswa kwamathimu lokhu kuzakwengeza isisindo somdlalo wabo.
“Injongo yokubumba imincintiswano entsha ngeyokuthi sibonakalise ithalenta lethu, kube lula ukuthi sikhethe abadlali abazangena kuqembu elidlalela isizwe.”
Online Reporter