admin
Johas Moyo
ABENHLANGANISO yeVeterinary Services Department esabelweni se Matabeleland South sebekhuthaze abalimi bonke ukuthi badoze izifuyo zonke zingakaqalisi ukudla amahlanga ikakhulu inkomo ukuze zakhe imizimba ziphinde zivikeleke emikhuhlaneni.
UEnat Mdlongwa onguDokotela wezinyamazana esabelweni se Matabeleland South uthe abalimi bonke kumele banakekele izifuyo zabo ikakhulu inkomo ngokuzidoza ikakhulu nxa zingakaqalisi ukudla amahlanga ngoba kuzincedisa ekubulaleni izibungu emathunjini.
“Kumqoka ukuthi abalimi banakekele inkomo zabo kungakho-ke kumele babone ukuthi ziyadozwa zingakaqali ukudla amahlanga ngoba lokhu kulakho ukuziphathisa ekubulaleni izibungu emathunjini.
“Ngokwenza kanjalo ukudla ezikudlayo kungena emzimbeni wazo kuhela kwakhe umzimba wazo kulokuthi izibungwana ezinjengamawemusi azo ziqale ukuhahabela ukudla esiswini sazo okungenza zehle kakhulu esikalini ziphinde zingabukeki kuhle,” kutsho uDokotela Mdlongwa.
Uqhubekele phambili njalo wathi abalimi kumele babambe njalo bazwisise indlela okufanele yokudozwa kwenkomo okuzabenza bahlale lezifuyo eziqinileyo njalo ezingagulaguliyo ngoba esithi amawemusi ayagulisa inkomo njalo kaziqini nxa zilawo ngoba esidla ukudla okunengi ezifuyweni.
“Sikhuthaza abalimi ukuthi benanzelele ukutshintsha kwesikhathi labo kuyabe kufanele ukuthi belungiselele izifuyo zabo njalo bazidoze ukuze zihlale zisesimweni esihle.
Nxa utshani busiba luhlaza kazidozwe inkomo ngokufanayo nxa utshani busoma kumele njalo bazidoze inkomo yikho sikhuthaza abalimi ukuthi inkomo njengoba zizangena amahlanga kaziqale zidozwe,” nguDkt Mdlongwa lo.
Online Reporter